റിയാദ്: ബഹ്റൈനിലെ സാധാരണക്കാർ ഉപയോഗിക്കുന്ന വ്യവസായ കേന്ദ്രത്തിന് നേരെ ഇറാൻ നടത്തിയ ആക്രമണത്തെ സൗദി അറേബ്യ ശക്തമായി അപലപിച്ചു. ബഹ്റൈന്റെ സുരക്ഷയും സ്ഥിരതയും സംരക്ഷിക്കുന്നതിനായി സ്വീകരിക്കുന്ന എല്ലാ നടപടികൾക്കും പൂർണ പിന്തുണയും ഐക്യദാർഢ്യവും പ്രഖ്യാപിച്ചു.
നവംബർ 22 ഞായറാഴ്ച സൗദി വിദേശകാര്യ മന്ത്രാലയം പുറത്തിറക്കിയ ഔദ്യോഗിക പ്രസ്താവനയിലൂടെയാണ് ഇറാന്റെ ആക്രമണത്തിനെതിരെ ശക്തമായ പ്രതിഷേധം അറിയിച്ചത്.
ബഹ്റൈനിലെ വ്യവസായ കേന്ദ്രത്തിന് നേരെ നവംബർ 21ന് നടന്ന ആക്രമണത്തെ തുടർന്ന് തീപിടിത്തവും നാശനഷ്ടങ്ങളും റിപ്പോർട്ട് ചെയ്തിരുന്നു. എന്നാൽ ആളപായമുണ്ടായിട്ടില്ലെന്ന് ബഹ്റൈൻ അധികൃതർ അറിയിച്ചു.
മേഖലയിലെ രാജ്യങ്ങളെയും സാധാരണക്കാർ ഉപയോഗിക്കുന്ന സ്ഥാപനങ്ങളെയും ലക്ഷ്യമിട്ട് ഇറാൻ നടത്തുന്ന തുടർച്ചയായ ആക്രമണങ്ങൾ അംഗീകരിക്കാനാവില്ലെന്ന് സൗദി വിദേശകാര്യ മന്ത്രാലയം വ്യക്തമാക്കി.
ഇത്തരം ആക്രമണങ്ങൾ അന്താരാഷ്ട്ര നിയമങ്ങളുടെയും ഐക്യരാഷ്ട്രസഭയുടെ ചാർട്ടറിന്റെയും ഇസ്ലാമിക സഹകരണ സംഘടനയുടെ (OIC) ചാർട്ടറിന്റെയും അയൽരാജ്യങ്ങൾ തമ്മിലുള്ള സൗഹൃദപരമായ സഹവർത്തിത്വ തത്വങ്ങളുടെയും ലംഘനമാണെന്ന് മന്ത്രാലയം ചൂണ്ടിക്കാട്ടി.
ഇറാന്റെ തുടർച്ചയായ നടപടികൾ മേഖലയുടെ സുരക്ഷയ്ക്കും സ്ഥിരതയ്ക്കും ഭീഷണിയാണെന്നും സൗദി അറേബ്യ വ്യക്തമാക്കി.
ബഹ്റൈന്റെ പരമാധികാരവും സുരക്ഷയും സംരക്ഷിക്കുന്നതിനുള്ള നടപടികളിൽ സൗദി അറേബ്യ ഉറച്ച പിന്തുണ നൽകുമെന്നും മന്ത്രാലയം ആവർത്തിച്ചു.
മേഖലയിലെ രാജ്യങ്ങൾക്കെതിരായ തുടർച്ചയായ ആക്രമണങ്ങളുടെ പ്രത്യാഘാതങ്ങൾക്ക് ഇറാനാണ് ഉത്തരവാദിയെന്നും സൗദി വിദേശകാര്യ മന്ത്രാലയം വ്യക്തമാക്കി.
