ബോസ്റ്റൺ: സൗദി അറേബ്യയും അമേരിക്കയും തമ്മിലുള്ള വിദ്യാഭ്യാസ, ഗവേഷണ മേഖലകളിലെ സഹകരണം കൂടുതൽ ശക്തിപ്പെടുത്തുന്നതിനായി അമേരിക്കയിലെ സൗദി അംബാസഡർ റീമ ബിൻത് ബന്ദർ രാജകുമാരിയും സൗദി വിദ്യാഭ്യാസ മന്ത്രി യൂസുഫ് അൽ ബെന്യാനും കൂടിക്കാഴ്ച നടത്തി.
അമേരിക്കയിലെ മസാച്യുസെറ്റ്സ് സംസ്ഥാനത്തെ ബോസ്റ്റണിലാണ് കൂടിക്കാഴ്ച നടന്നത്. അമേരിക്കൻ സർവകലാശാലകളുടെയും പ്രമുഖ വിദ്യാഭ്യാസ, ഗവേഷണ സ്ഥാപനങ്ങളുടെയും പ്രതിനിധികളുമായി ചർച്ചകൾ നടത്തുന്നതിനായി സൗദി വിദ്യാഭ്യാസ മന്ത്രി നടത്തുന്ന ഔദ്യോഗിക സന്ദർശനത്തിന്റെ ഭാഗമായിരുന്നു കൂടിക്കാഴ്ച.
ഇരുരാജ്യങ്ങളും തമ്മിലുള്ള വിദ്യാഭ്യാസ, ഗവേഷണ സഹകരണത്തിന്റെ നിലവിലെ സാഹചര്യങ്ങൾ ഇരുവരും അവലോകനം ചെയ്തു. അമേരിക്കയിലെ പ്രമുഖ വിദ്യാഭ്യാസ സ്ഥാപനങ്ങളുമായി അക്കാദമിക്, ശാസ്ത്രീയ പങ്കാളിത്തം കൂടുതൽ ശക്തിപ്പെടുത്തുന്നതിനുള്ള മാർഗങ്ങളും ചർച്ചയായി.
ഉന്നത വിദ്യാഭ്യാസം, ശാസ്ത്രീയ ഗവേഷണം, വിദ്യാഭ്യാസ രംഗത്തെ പുതിയ സാങ്കേതികവിദ്യകൾ, മനുഷ്യവിഭവശേഷി വികസനം തുടങ്ങിയ മേഖലകളിൽ സംയുക്ത സഹകരണം വിപുലീകരിക്കുന്നതിനുള്ള സാധ്യതകളും കൂടിക്കാഴ്ചയിൽ വിലയിരുത്തി.
വിദ്യാഭ്യാസ, ഗവേഷണ മേഖലകളിലെ അറിവുകളും അനുഭവങ്ങളും പരസ്പരം കൈമാറുന്നതിലൂടെ സൗദി അറേബ്യയുടെ വിദ്യാഭ്യാസ വികസന പദ്ധതികൾക്ക് കൂടുതൽ കരുത്തേകാനാകുമെന്ന് ഇരുവരും അഭിപ്രായപ്പെട്ടു.
അമേരിക്കയിലെ സൗദി എംബസിയും സൗദി വിദ്യാഭ്യാസ മന്ത്രാലയവും തമ്മിലുള്ള ഏകോപനം ശക്തിപ്പെടുത്തേണ്ടതിന്റെ പ്രാധാന്യവും ചർച്ചയിൽ ഊന്നിപ്പറഞ്ഞു.
അമേരിക്കൻ സർവകലാശാലകളുമായും ഗവേഷണ സ്ഥാപനങ്ങളുമായും സൗദി വിദ്യാഭ്യാസ മേഖലയ്ക്കുള്ള ബന്ധം കൂടുതൽ സുഗമമാക്കുന്നതിനും സംയുക്ത വിദ്യാഭ്യാസ പദ്ധതികൾക്ക് പിന്തുണ നൽകുന്നതിനുമുള്ള നടപടികളും ഇരുവരും ചർച്ച ചെയ്തു.
അന്താരാഷ്ട്ര വിദ്യാഭ്യാസ പങ്കാളിത്തങ്ങൾ വികസിപ്പിക്കുന്നതിനും ശാസ്ത്രീയ ഗവേഷണ അവസരങ്ങൾ വർധിപ്പിക്കുന്നതിനും സൗദിയിലെ വിദ്യാർഥികളുടെയും ഗവേഷകരുടെയും കഴിവുകൾ മെച്ചപ്പെടുത്തുന്നതിനുമുള്ള ശ്രമങ്ങളുടെ ഭാഗമായാണ് കൂടിക്കാഴ്ച നടന്നത്.
