റിയാദ്: സൗദി അറേബ്യയിൽ 2026ലെ മൂന്നാം പാദത്തിൽ റിയൽ എസ്റ്റേറ്റ് വിലയിൽ വാർഷികാടിസ്ഥാനത്തിൽ 1.2 ശതമാനം വർധന. പാർപ്പിട, കാർഷിക ഭൂമികളുടെ വില ഉയർന്നതാണ് മൊത്തത്തിലുള്ള വളർച്ചയ്ക്ക് കാരണമെന്ന് ജനറൽ അതോറിറ്റി ഫോർ സ്റ്റാറ്റിസ്റ്റിക്സ് (ഗാസ്റ്റാറ്റ്) അറിയിച്ചു.
ഗാസ്റ്റാറ്റിന്റെ റിയൽ എസ്റ്റേറ്റ് പ്രൈസ് ഇൻഡക്സ് റിപ്പോർട്ട് പ്രകാരം പാർപ്പിട സ്വത്തുക്കളുടെ വിലയിൽ 2.3 ശതമാനവും കാർഷിക ഭൂമികളുടെ വിലയിൽ 3.9 ശതമാനവും വർധന രേഖപ്പെടുത്തി. എന്നാൽ വാണിജ്യ സ്വത്തുക്കളുടെ വിലയിൽ രണ്ട് ശതമാനം ഇടിവുണ്ടായി.
പാർപ്പിട മേഖലയിലെ ഭൂമിയുടെ വില 4.9 ശതമാനവും അപ്പാർട്ട്മെന്റുകളുടെ വില 1.7 ശതമാനവും റെസിഡൻഷ്യൽ ഫ്ലോർ യൂണിറ്റുകളുടെ വില 0.8 ശതമാനവും ഉയർന്നു. അതേസമയം വില്ലകളുടെ വില കഴിഞ്ഞ വർഷത്തെ ഇതേ പാദത്തെ അപേക്ഷിച്ച് 7.7 ശതമാനം കുറഞ്ഞു.
വാണിജ്യ മേഖലയിൽ ഭൂമിയുടെ വില 2.1 ശതമാനവും കെട്ടിടങ്ങളുടെ വില 1.4 ശതമാനവും ഷോറൂമുകളുടെയും റീട്ടെയിൽ കടകളുടെയും വില 0.9 ശതമാനവും കുറഞ്ഞു. കാർഷിക ഭൂമികളുടെ വില ഉയർന്നതാണ് ഈ വിഭാഗത്തിലെ 3.9 ശതമാനം വളർച്ചയ്ക്ക് പിന്നിൽ.
തൊട്ടുമുൻപത്തെ പാദത്തെ അപേക്ഷിച്ച് വില കുറഞ്ഞു
വാർഷിക വളർച്ച രേഖപ്പെടുത്തിയെങ്കിലും 2026ലെ രണ്ടാം പാദത്തെ അപേക്ഷിച്ച് മൂന്നാം പാദത്തിൽ രാജ്യത്തെ മൊത്തം റിയൽ എസ്റ്റേറ്റ് വില സൂചിക 1.2 ശതമാനം കുറഞ്ഞു.
പാർപ്പിട സ്വത്തുക്കളുടെ വിലയിൽ 1.5 ശതമാനം ഇടിവുണ്ടായി. പാർപ്പിട ഭൂമിയുടെ വില 2.1 ശതമാനവും അപ്പാർട്ട്മെന്റുകളുടെ വില 0.5 ശതമാനവും വില്ലകളുടെ വില 0.4 ശതമാനവും കുറഞ്ഞു. എന്നാൽ റെസിഡൻഷ്യൽ ഫ്ലോർ യൂണിറ്റുകളുടെ വിലയിൽ ഒരു ശതമാനം വർധനയുണ്ടായി.
വാണിജ്യ സ്വത്തുക്കളുടെ വില തൊട്ടുമുൻപത്തെ പാദത്തെ അപേക്ഷിച്ച് 0.3 ശതമാനം കുറഞ്ഞപ്പോൾ കാർഷിക ഭൂമികളുടെ വില 0.2 ശതമാനം ഉയർന്നു.
നോർതേൺ ബോർഡേഴ്സിൽ ഏറ്റവും ഉയർന്ന വർധന
പ്രദേശാടിസ്ഥാനത്തിൽ നോർതേൺ ബോർഡേഴ്സിലാണ് വാർഷികാടിസ്ഥാനത്തിൽ ഏറ്റവും ഉയർന്ന വിലവർധന രേഖപ്പെടുത്തിയത്—12 ശതമാനം. റിയാദിൽ 4.6 ശതമാനവും മദീനയിൽ 0.3 ശതമാനവും വർധനയുണ്ടായി.
അതേസമയം അസീറിൽ 4.3 ശതമാനമാണ് വിലയിടിവ്. ഹായിലിൽ 3.8 ശതമാനവും കിഴക്കൻ പ്രവിശ്യയിൽ 3.7 ശതമാനവും അൽജൗഫിൽ 2.8 ശതമാനവും വില കുറഞ്ഞു.
റിയൽ എസ്റ്റേറ്റ് ഇടപാടുകളുടെ വിവരങ്ങൾ അടിസ്ഥാനമാക്കിയാണ് വിലസൂചിക തയ്യാറാക്കുന്നതെന്ന് ഗാസ്റ്റാറ്റ് വ്യക്തമാക്കി. റിയൽ എസ്റ്റേറ്റ് ജനറൽ അതോറിറ്റി, നീതിന്യായ മന്ത്രാലയം, സൗദി സെൻട്രൽ ബാങ്ക് എന്നിവയുമായി സഹകരിച്ച് പുതുക്കിയ രീതിശാസ്ത്രവും നടപ്പാക്കിയിട്ടുണ്ട്. ഭൂമിശാസ്ത്രപരമായ നിർമിതബുദ്ധിയും ഉപഗ്രഹ ചിത്രങ്ങളും ഉപയോഗിക്കുന്നത് സ്വത്തുക്കളുടെ വർഗീകരണവും വിവരങ്ങളുടെ കൃത്യതയും മെച്ചപ്പെടുത്താൻ സഹായിക്കുമെന്ന് അതോറിറ്റി അറിയിച്ചു.
About the Author
