അബൂദാബി– 377 കിലോഗ്രാം ക്രിസ്റ്റൽ മെത്ത് കൈവശം വെച്ച മൂന്നംഗ സംഘം അബൂദാബിയിൽ പിടിയിൽ. തയ്യൽ മെഷീനുകൾക്കായി നിർമ്മിച്ച ഓയിൽ ക്യാനുകൾക്കുള്ളിലായാണ് മയക്കുമരുന്ന് കടത്താൻ ശ്രമിച്ചത്. മൂന്ന് ഏഷ്യൻ പൗരന്മാരാണ് പിടിയിലായത്. അബൂദാബി പോലീസും നാഷണൽ ഡ്രഗ് കൺട്രോൾ സർവീസും സംയുക്തമായി നടത്തിയ ഓപ്പറേഷനിലാണ് പ്രതികളെ പിടികൂടാൻ സാധിച്ചത്. കുറ്റവാളികളെ അറസ്റ്റ് ചെയ്ത ശേഷം ബന്ധപ്പെട്ട അധികാരികൾക്ക് കൈമാറി.
ലഹരിവസ്തുക്കളുടെ ദുരുപയോഗം ഒരാളെ സന്തോഷിപ്പിക്കുമെന്ന തെറ്റിദ്ധാരണയിൽ വീഴരുതെന്നും പോലീസ് അഭ്യർത്ഥിച്ചു. ഇത് മനുഷ്യന്റെ ആരോഗ്യത്തെയും സുരക്ഷയെയും പ്രതികൂലമായി ബാധിക്കുമെന്നും മുന്നറിയിപ്പ് നൽകി. ഇത്തരം കേസുകൾ ശ്രദ്ധയിൽപ്പെട്ടാൽ 8002626 എന്ന നമ്പറിൽ സുരക്ഷാ ഏജൻസിയെ വേഗത്തിൽ അറിയിക്കണമെന്ന് പോലീസ് പൊതുജനങ്ങളോട് ആവശ്യപ്പെട്ടു.
