ജിദ്ദ: അടിസ്ഥാന ഭക്ഷ്യവസ്തുക്കളുടെ വിലയും ലഭ്യതയും നിരീക്ഷിക്കുന്നതിനും വിപണിയിൽ അവയുടെ തുടർച്ചയായ ലഭ്യത ഉറപ്പാക്കുന്നതിനുമായി സൗദി വാണിജ്യ മന്ത്രാലയം 50 വൻകിട ഭക്ഷ്യ കമ്പനികളുമായി ഇ-ലിങ്ക് സംവിധാനം ഏർപ്പെടുത്തി. സ്റ്റീൽ, സിമന്റ് ഉൾപ്പെടെയുള്ള നിർമാണ സാമഗ്രികളുടെ ഉൽപാദന അളവ് പരിശോധിക്കാനും വർധിച്ചുവരുന്ന ആവശ്യങ്ങൾ നിറവേറ്റാനും ലക്ഷ്യമിട്ട് 26 നിർമാണ കമ്പനികളുമായും ഇ-ലിങ്ക് സംവിധാനം നടപ്പാക്കിയിട്ടുണ്ട്.
വില നിരീക്ഷണവും സ്ഥിരത ഉറപ്പാക്കലും ലക്ഷ്യമിട്ട്, ബന്ധപ്പെട്ട വകുപ്പുകളുമായുള്ള തുടർച്ചയായ ഏകോപനത്തിലൂടെയാണ് ഈ സംവിധാനം പ്രവർത്തിക്കുന്നതെന്ന് മന്ത്രാലയം വ്യക്തമാക്കി. ‘ഇംതിസാൽ’ എന്ന ഇലക്ട്രോണിക് പരിശോധന-മേൽനോട്ട സംവിധാനത്തിന്റെ ഭാഗമായാണ് ഇ-ലിങ്ക് പദ്ധതി നടപ്പാക്കുന്നത്. ഇതിലൂടെ പ്രവർത്തനങ്ങൾ ഓട്ടോമേറ്റ് ചെയ്യുകയും വിപണിയിൽ സുതാര്യത ഉറപ്പാക്കുകയും ചെയ്യുന്നു.
ഈ സാങ്കേതിക ലിങ്കേജ് പദ്ധതി വഴി ഭക്ഷ്യ-നിർമാണ മേഖലകളിലെ വിലകളും സാധനങ്ങളുടെ ലഭ്യതയും മന്ത്രാലയം സൂക്ഷ്മമായി നിരീക്ഷിക്കുന്നു. രാജ്യത്തെ ബിസിനസ് അന്തരീക്ഷം മെച്ചപ്പെടുത്താനും, സാമ്പത്തിക സ്ഥിരത പിന്തുണയ്ക്കാനും, വാണിജ്യ വിപണികളിൽ സുതാര്യത കൈവരിക്കാനും ഈ ശ്രമങ്ങൾ ലക്ഷ്യമിടുന്നു. മേൽനോട്ടത്തിലും നിയന്ത്രണത്തിലും മികച്ച രീതികൾ നടപ്പാക്കി, ഉപഭോക്താക്കളുടെയും ബിസിനസുകളുടെയും ആവശ്യങ്ങൾ നിറവേറ്റുന്ന അനുകൂല ബിസിനസ് അന്തരീക്ഷം സൃഷ്ടിക്കാനുള്ള മന്ത്രാലയത്തിന്റെ പ്രതിബദ്ധത ഇത് പ്രകടമാക്കുന്നു.
പരിശോധനാ പ്രവർത്തനങ്ങൾ കാര്യക്ഷമമാക്കാൻ 767 ഔദ്യോഗിക വാഹനങ്ങൾ മന്ത്രാലയം പരിശോധകർക്കായി ഏർപ്പെടുത്തിയിട്ടുണ്ട്. വാഹനങ്ങളുടെ നീക്കങ്ങൾ നിരീക്ഷിക്കാനും സുതാര്യത വർധിപ്പിക്കാനും ഒരു സംയോജിത സംവിധാനവും വികസിപ്പിച്ചിട്ടുണ്ട്. തത്സമയ ലൊക്കേഷൻ ട്രാക്കിംഗും ഫീൽഡ് വിസിറ്റ് റിപ്പോർട്ടുകളും താരതമ്യം ചെയ്ത് പരിശോധകരുടെ പ്രകടനം വിലയിരുത്തുന്നു. കൂടാതെ, ഇന്ധന ഉപഭോഗം ദിവസേന ട്രാക്ക് ചെയ്യാൻ ഔദ്യോഗിക വാഹനങ്ങളിൽ ഇലക്ട്രോണിക് ചിപ്പുകൾ സ്ഥാപിച്ചിട്ടുണ്ട്, ഇത് ചെലവ് നിയന്ത്രണത്തിൽ കൃത്യത ഉറപ്പാക്കുന്നു.
