ജിദ്ദ: സൗദിയിൽ വ്യാജ ട്രേഡ് മാർക്കുകൾ ഉപയോഗിച്ചുള്ള ഉൽപ്പന്നങ്ങൾക്കെതിരെ നടപടി കർശനമാക്കി അതോറിറ്റി. അതോറിറ്റി നടത്തിയ പരിശോധനയിൽ നിരവധി ഉൽപ്പന്നങ്ങൾ പിടികൂടി. 5 ലക്ഷത്തോളം ട്രേഡ് മാർക്കുകളാണ് ഔദ്യോഗികമായി രജിസ്റ്റർ ചെയ്തിട്ടുള്ളത്.
സൗദി ഇൻറലെക്ച്വൽ പ്രോപ്പർട്ടി അതോറിറ്റിയാണ് 2024ന്റെ ആദ്യ പകുതിയിൽ 8.73 ലക്ഷം വ്യാജ വാണിജ്യ ചിഹ്നങ്ങളുപയോഗിച്ച ഉൽപ്പന്നങ്ങൾ പിടികൂടിയത്. ഇതിൽ 50% വാഹന ഉപകരണങ്ങൾ, 22% ഭക്ഷ്യ ഉൽപ്പന്നങ്ങൾ, 6% ക്ലീനിംഗ് മെറ്റീരിയലുകൾ എന്നിവ ഉൾപ്പെടുന്നു.
രണ്ടുലക്ഷത്തോളം വ്യാജ ടയറുകളാണ് പിടിച്ചെടുത്തത്. 47,634 ട്രേഡ് മാർക്കുകളും 7,234 പേറ്റന്റുകളും 1,935 ഡിസൈനുകളും 2,682 കോപ്പിറൈറ്റ് അപേക്ഷകളും രജിസ്റ്റർ ചെയ്തിട്ടുണ്ട്. വ്യാജ ഉൽപ്പന്നങ്ങൾക്കെതിരെ സാങ്കേതിക സുരക്ഷയും ബോധവൽക്കരണ ക്യാമ്പയിനുകളും ശക്തമാക്കുകയാണ് അതോറിറ്റി.
