ദുബായ്: അറ്റകുറ്റപ്പണികള്‍ നടക്കുന്നതിനാല്‍ അല്‍ മക്തൂം പാലം ഭാഗികമായി അടച്ചിടും. 2025 ജനുവരി 16 വരെയായിരിക്കും അറ്റകുറ്റപ്പണികള്‍ക്കായി പാലം അടച്ചിടുക. അതിനാല്‍ ഇതുവഴിയുള്ള ഗതാഗതത്തില്‍ നിയന്ത്രണം ഏര്‍പ്പെടുത്തുമെന്ന് റോഡ്സ് ആന്‍ഡ് ട്രാന്‍സ്പോര്‍ട്ട് അതോറിറ്റി വ്യാഴാഴ്ച അറിയിച്ചു. പ്രധാന പാലം തിങ്കള്‍ മുതല്‍ ശനിവരെ രാത്രി 11 മുതല്‍ പുലര്‍ച്ചെ 5 വരെയും ഞായറാഴ്ചകളിലും മറ്റ് പൊതു അവധി ദിനങ്ങളിലും 24 മണിക്കൂറും അടച്ചിടും. ബാക്കി സമയങ്ങളില്‍ നിയന്ത്രണങ്ങളോടെ ഗതാഗതം അനുവദിക്കും.
കൃത്യസമയത്ത് ലക്ഷ്യസ്ഥാനത്ത് എത്താന്‍ ബദല്‍ റൂട്ടുകള്‍ ഉപയോഗിച്ച് യാത്ര മുന്‍കൂട്ടി ആസൂത്രണം ചെയ്യണമെന്ന് വാഹനമോടിക്കുന്നവരോട് ആര്‍ടിഎ അഭ്യര്‍ഥിച്ചു. അല്‍മക്തൂം പാലം വഴി പോകുന്നവര്‍ക്ക് നിയന്ത്രണമുള്ള സമയങ്ങളില്‍ ഉപയോഗിക്കാവുന്ന ബദല്‍ റൂട്ടുകള്‍ ഇവയാണ്. ദേര മുതല്‍ ബര്‍ ദുബായ് വരെ പോകുന്നവര്‍ക്ക് ബനിയാസ് റോഡ്, അല്‍ ഖലീജ് സ്ട്രീറ്റ്, കോര്‍ണിഷ് സ്ട്രീറ്റ് എന്നിവയിലൂടെ ഇന്‍ഫിനിറ്റി ബ്രിഡ്ജിലേക്ക് പോകാം.
അതേപോലെ ബനിയാസ് റോഡിലൂടെയും അല്‍ ഖലീജ് സ്ട്രീറ്റിലൂടെയും അല്‍ ഷിന്ദഗ ടണലിലെത്താം, ബനിയാസ് റോഡിലൂടെയും ഷെയ്ഖ് റാഷിദ് റോഡിലൂടെയും അല്‍ ഗര്‍ഹൂദ് പാലത്തിലും ബനിയാസ് റോഡ്, ഷെയ്ഖ് റാഷിദ് റോഡ്, റിബാറ്റ് സ്ട്രീറ്റ് എന്നിവയിലൂടെ ബിസിനസ് ബേ ക്രോസിംഗ് പാലത്തിലും എത്താനാവും.
ബര്‍ ദുബായ് മുതല്‍ ദെയ്റ വരെ യാത്ര ചെയ്യുന്നവര്‍ക്ക് താരിഖ് ബിന്‍ സിയാദ് റോഡ്, ഖാലിദ് ബിന്‍ അല്‍ വലീദ് റോഡ്, അല്‍ ഖലീജ് സ്ട്രീറ്റ് എന്നിവയിലൂടെ ഇന്‍ഫിനിറ്റി ബ്രിഡ്ജ് അല്ലെങ്കില്‍ അല്‍ ഷിന്ദഗ ടണല്‍ വഴി യാത്ര ചെയ്യാനാവും. അതേപോലെ ഔദ് മേത്ത റോഡിലൂടെയും ഷെയ്ഖ് റാഷിദ് റോഡിലൂടെയും അല്‍ ഗര്‍ഹൂദ് പാലത്തിലെത്താം. ഔദ് മേത്ത, അല്‍ ഖൈല്‍ റോഡ് ദുബായ് വഴി ബിസിനസ് ബേ ക്രോസിങ് ബ്രിഡ്ജിലെത്താനും സാധിക്കും.
1962ല്‍ ഉദ്ഘാടനം ചെയ്യപ്പെട്ട അല്‍ മക്തൂം പാലം ദെയ്റയെയും ബര്‍ ദുബായിയെയും ബന്ധിപ്പിക്കുന്ന ദുബായ് ക്രീക്കിന് കുറുകെയുള്ള അഞ്ച് പാലങ്ങളില്‍ ഏറ്റവും പഴക്കമുള്ളതാണ്. പാലങ്ങള്‍, റോഡുകള്‍, ഗതാഗത സംവിധാനം എന്നിവയുടെ അടിസ്ഥാന സൗകര്യങ്ങള്‍ നല്ല നിലയില്‍ നിലനിര്‍ത്തുന്നതിനുള്ള ആര്‍ടിഎയുടെ ശ്രമങ്ങളുടെ ഭാഗമായുള്ള ഇത് പതിവ് അറ്റകുറ്റപ്പണികള്‍ക്കായാണ് പാലം അടച്ചിടുന്നതെന്ന് അധികൃതര്‍ അറിയിച്ചു.
അല്‍ മക്തൂം ബ്രിഡ്ജ് തുറക്കാനും അടയ്ക്കാനും സഹായിക്കുന്ന ഹൈഡ്രോളിക് പമ്പുകള്‍ ഘടിപ്പിച്ച ചലിക്കുന്ന പാലമാണ്. ദുബായ് ക്രീക്കില്‍ സമുദ്ര നാവിഗേഷന്‍ സുഗമമാക്കുന്നതിനും കപ്പലുകള്‍ക്കും ഉയര്‍ന്ന ബോട്ടുകള്‍ക്കും അടിയിലൂടെ കടന്നുപോകാന്‍ അനുവദിക്കുന്നതിനും വേണ്ടിയാണ് പാലം ഉയര്‍ത്തുന്നത്. അതിനാല്‍ പാലം ചലിപ്പിക്കുന്നതിനുള്ള സുപ്രധാന യന്ത്രങ്ങളുടെ പ്രവര്‍ത്തന പരിശോധനയും ലൂബ്രിക്കേഷന്‍ ആവശ്യമുള്ള ഭാഗങ്ങളുടെ നിരീക്ഷണം ഉള്‍പ്പെടെയുള്ള പതിവ് പരിശോധനകളും അനിവാര്യമാണ്
