മക്ക ഹറമിലേക്കുള്ള യാത്ര ഇനി കൂടുതൽ സുഖകരം: ഫോർത്ത് റിംഗ് ഇന്റർചേഞ്ച് പ്രവർത്തനം തുടങ്ങി

മക്ക- ഫോർത്ത് റിംഗ് റോഡ്, കിംഗ് ഫൈസൽ റോഡ് (അൽസൈൽ റോഡ്) ഇന്റർചേഞ്ച് പൂർണ തോതിൽ വാഹന ഗതാഗതത്തിന് തുറന്നുകൊടുത്തു. ഇന്റർസെക്ഷൻ നിർമാണ ജോലികൾ നിശ്ചയിച്ച സമയത്തിന് മുമ്പ് പൂർത്തിയായതായി മക്ക റോയൽ കമ്മീഷൻ അറിയിച്ചു. ഫോർത്ത് റിംഗ് റോഡിൽ നിന്ന് കിംഗ് ഫൈസൽ റോഡിൽ ഹറമിലേക്കും അൽസൈലിലേക്കുമായി ഇരു ദിശകളിലേക്കും വരുന്ന വാഹനങ്ങൾക്ക് നേരിട്ടുള്ള പാതകൾ ഒരുക്കിയിട്ടുണ്ട്. പ്രധാന പാതകൾ തമ്മിലുള്ള കണക്റ്റിവിറ്റി മെച്ചപ്പെടുത്താനും മക്കയിലെ ഏറ്റവും പ്രധാനപ്പെട്ട കവലകളിൽ ഒന്നിൽ ഗതാഗതം വർധിപ്പിക്കാനും ഇത് സഹായിക്കുന്നു.

യാത്രാ സമയം കുറക്കാനും ഗതാഗത സുരക്ഷ മെച്ചപ്പെടുത്താനും പദ്ധതി സഹായിക്കുന്നു. ഹജ്, ഉംറ സീസണുകളിൽ വിശുദ്ധ ഹറമിനടുത്തുള്ള സെൻട്രൽ ഏരിയയിലേക്കും പുണ്യസ്ഥലങ്ങളിലേക്കുമുള്ള സുഗമമായ പ്രവേശനത്തെ ഇത് പിന്തുണക്കുന്നു. ഇൻ്റർസെക്ഷൻ നിശ്ചയിച്ചതിലും മുമ്പ് പൂർണ തോതിൽ പ്രവർത്തിപ്പിക്കാനായത് കാര്യക്ഷമമായ ആസൂത്രണത്തെയും നിർവ്വഹണത്തെയും ബന്ധപ്പെട്ട വകുപ്പുകളുടെ സംയോജിത ശ്രമങ്ങളെയും പ്രതിഫലിപ്പിക്കുന്നു. മക്ക നിവാസികളുടെയും ഹറം സന്ദർശകരുടെയും അനുഭവം വർധിപ്പിക്കാനുള്ള വിഷൻ 2030 ലക്ഷ്യങ്ങൾക്ക് അനുസൃതമായി, വിശുദ്ധ മക്കയിലെ അടിസ്ഥാന സൗകര്യങ്ങൾ വികസിപ്പിക്കാനും ജീവിത നിലവാരം മെച്ചപ്പെടുത്താനുമുള്ള ലക്ഷ്യങ്ങളുമായി ഇത് യോജിക്കുന്നു.