റിയാദ്: സൗദി അറേബ്യയുടെ ദേശീയ ഉൽപ്പന്നങ്ങളുടെ തനിമയും പ്രശസ്തിയും സംരക്ഷിക്കാൻ ലക്ഷ്യമിട്ടുള്ള സുപ്രധാന നിയമത്തിന് അംഗീകാരമായി. പ്രാദേശിക ഉൽപ്പന്നങ്ങളുടെ ഭൂമിശാസ്ത്രപരമായ സൂചനകൾക്ക് സംരക്ഷണം നൽകുന്ന പുതിയ നിയമം പ്രാബല്യത്തിൽ വരുന്നതോടെ, നിയമം ലംഘിക്കുന്നവർക്ക് കനത്ത പിഴയും തടവും ശിക്ഷയായി ലഭിക്കും.
ഉൽപ്പന്നങ്ങളുടെ യഥാർത്ഥ ഉത്ഭവത്തെക്കുറിച്ച് ഉപഭോക്താക്കളെ തെറ്റിദ്ധരിപ്പിക്കുന്ന രീതിയിൽ അനധികൃതമായി ഇവ അനുകരിക്കുന്നതും ചൂഷണം ചെയ്യുന്നതും പുതിയ നിയമത്തിലൂടെ കർശനമായി തടയും.
നിയമലംഘനങ്ങൾക്ക് പുതിയ നിയമം ശക്തമായ ശിക്ഷാ നടപടികളാണ് വ്യവസ്ഥ ചെയ്യുന്നത്. കുറഞ്ഞത് 5,000 റിയാൽ മുതൽ 10 ലക്ഷം റിയാൽ വരെ പിഴയോ, ഒരു മാസം മുതൽ മൂന്ന് വർഷം വരെ തടവോ അല്ലെങ്കിൽ ഇവ രണ്ടും കൂടിയോ ശിക്ഷയായി ലഭിക്കും.
വ്യാജ ഉൽപ്പന്നങ്ങൾ അതിന്റെ രൂപം, പാക്കേജിംഗ്, പരസ്യം, പേര് എന്നിവയിൽ യഥാർത്ഥ ഉൽപ്പന്നത്തിൻ്റെ ഭൂമിശാസ്ത്രപരമായ സൂചന അനുകരിക്കുന്നത് ഉപഭോക്താക്കൾക്കിടയിൽ ആശയക്കുഴപ്പമുണ്ടാക്കിയാൽ കനത്ത ശിക്ഷ ഉറപ്പാണ്. കുറ്റകൃത്യം ആവർത്തിച്ചാൽ പിഴ ഇരട്ടിയാക്കുകയും സ്ഥാപനം അടച്ചുപൂട്ടുകയും ചെയ്യും.
എന്താണ് ഭൂമിശാസ്ത്രപരമായ സൂചന?
ഒരു പ്രത്യേക ഭൂമിശാസ്ത്രപരമായ സ്ഥലത്ത് നിന്നാണ് ഉൽപ്പന്നം ഉത്ഭവിക്കുന്നതെന്നും, അതിൻ്റെ ഗുണനിലവാരം ഉത്ഭവസ്ഥാനവുമായി ബന്ധപ്പെട്ടിരിക്കുന്നു എന്നും സൂചിപ്പിക്കുന്ന അടയാളങ്ങളാണ് ഭൂമിശാസ്ത്രപരമായ സൂചനകൾ.
സൗദി ഈന്തപ്പഴം, തായിഫ് റോസുകൾ, നജ്‌റാൻ തേൻ തുടങ്ങിയ, രാജ്യത്തിൻ്റെ വിവിധ പ്രദേശങ്ങളുമായി ബന്ധപ്പെട്ട തനത് ഉൽപ്പന്നങ്ങളെ അനധികൃത ഉപയോഗത്തിൽ നിന്ന് സംരക്ഷിക്കാൻ ഈ നിയമം സഹായിക്കും. ഈ ഉൽപ്പന്നങ്ങളുടെ മത്സരക്ഷമത വർദ്ധിപ്പിക്കാനും പുതിയ നിയമം ലക്ഷ്യമിടുന്നു.
നിയമം ഔദ്യോഗിക ഗസറ്റിൽ പ്രസിദ്ധീകരിച്ച് 180 ദിവസത്തിന് ശേഷം പ്രാബല്യത്തിൽ വരും. ഈ കാലയളവിനുള്ളിൽ സൗദി അതോറിറ്റി ഫോർ ഇൻ്റലക്ച്വൽ പ്രോപ്പർട്ടി (SAIP) നിയമത്തിൻ്റെ എക്സിക്യൂട്ടീവ് റെഗുലേഷനുകൾ പുറത്തിറക്കും.
