സൗദിയിലെ അസീർ മുനിസിപ്പാലിറ്റി പരിസ്ഥിതി ആരോഗ്യ വിഭാഗം നടത്തിയ പരിശോധനയിൽ, റെസിഡൻഷ്യൽ ഏരിയയിൽ പ്രവർത്തിച്ചിരുന്ന ഒരു മധുരപലഹാര നിർമ്മാണ കേന്ദ്രം പിടികൂടി അടച്ചുപൂട്ടി.
ആരോഗ്യ സർട്ടിഫിക്കറ്റ് ഇല്ലാത്ത തൊഴിലാളികൾ, വൃത്തിഹീനമായ അന്തരീക്ഷം, കാലഹരണപ്പെട്ട ലൈസൻസോടെ പ്രവർത്തിക്കുക, മുനിസിപ്പൽ-ആരോഗ്യ മാനദണ്ഡങ്ങൾ പാലിക്കാതിരിക്കുക, സി.സി.ടി.വി. നിരീക്ഷണ സംവിധാനങ്ങൾ ഇല്ലാത്തത്. എന്നിവയാണ് ഈ സ്ഥാപനത്തിനെതിരെയുള്ള പ്രധാന കണ്ടെത്തലുകൾ.
കൂടാതെ, കേടുവന്ന ഉപകരണങ്ങൾ, ഉപയോഗശൂന്യമായ തുണികൊണ്ടുള്ള ടവലുകൾ എന്നിവ ഉപയോഗിച്ചിരുന്നതായും, ഭക്ഷ്യവസ്തുക്കൾ നേരിട്ട് സൂര്യരശ്മി ഏൽക്കുന്ന രീതിയിൽ പ്രദർശിപ്പിച്ചിരുന്നതായും കണ്ടെത്തി.
ഇത് ഉപഭോക്താക്കളുടെ ആരോഗ്യത്തിന് ഗുരുതരമായ ഭീഷണിയാണ് ഉയർത്തുന്നത്. സ്ഥാപനം പിടികൂടുന്ന സമയത്ത് ഏഴ് തൊഴിലാളികൾ പിൻവാതിലിലൂടെ ഓടി രക്ഷപ്പെട്ടു.
പൊതുജനാരോഗ്യ നിയന്ത്രണങ്ങൾക്ക് മുനിസിപ്പാലിറ്റി വലിയ പ്രാധാന്യം നൽകുന്നുണ്ടെന്നും, സമൂഹത്തിൻ്റെ ആരോഗ്യവും സുരക്ഷയും തങ്ങളുടെ പ്രധാന മുൻഗണനയാണെന്നും മുഹായിൽ അസീർ മുനിസിപ്പൽ മേധാവി വ്യക്തമാക്കി.
ഫീൽഡ് പരിശോധനകൾ തുടരുമെന്നും നിയമലംഘനം നടത്തുന്ന സ്ഥാപനങ്ങൾക്കെതിരെ നിയമനടപടികൾ സ്വീകരിക്കുമെന്നും അദ്ദേഹം കൂട്ടിച്ചേർത്തു.
മുനിസിപ്പാലിറ്റിയുടെ പ്രവർത്തനങ്ങളെ പിന്തുണയ്ക്കുന്നതിനും സേവന നിലവാരം മെച്ചപ്പെടുത്തുന്നതിനും ഉപഭോക്താക്കളെ സംരക്ഷിക്കുന്നതിനുമായി, മുനിസിപ്പൽ നിയമലംഘനങ്ങൾ ശ്രദ്ധയിൽപ്പെട്ടാൽ 940 എന്ന ഏകീകൃത റിപ്പോർട്ടിംഗ് സെൻ്റർ വഴി അറിയിക്കണമെന്ന് മുനിസിപ്പാലിറ്റി പൗരന്മാരോടും താമസക്കാരോടും അഭ്യർത്ഥിച്ചു.
