ദുബായ്: 2025 ജനുവരി മുതൽ ജൂൺ വരെയുള്ള ആറ് മാസത്തിനിടെ, യുഎഇയിൽ വിദേശ പ്രവേശന, താമസ നിയമങ്ങൾ ലംഘിച്ചതിന് 32,000-ലേറെ വിദേശികളെ ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ഐസിപി) അറസ്റ്റ് ചെയ്തു. രാജ്യവ്യാപകമായി നടത്തിയ പരിശോധനാ യജ്ഞത്തിന്റെ ഭാഗമായാണ് ഈ നടപടി. വിദേശികളുടെ താമസവും തൊഴിലും നിയന്ത്രിക്കുന്ന നിയമങ്ങൾ പാലിക്കുന്നത് പ്രോത്സാഹിപ്പിക്കുകയാണ് ഈ കാമ്പെയ്‌നിന്റെ ലക്ഷ്യം.
നിയമലംഘനങ്ങൾ കുറയ്ക്കുകയും നിയമപരമായ താമസവും തൊഴിലും പ്രോത്സാഹിപ്പിക്കുന്നതിലൂടെ താമസക്കാർക്കും സന്ദർശകർക്കും മാന്യമായ ജീവിതം ഉറപ്പാക്കുകയുമാണ് ഈ യജ്ഞത്തിലൂടെ ലക്ഷ്യമിടുന്നതെന്ന് ഐസിപി ഡയറക്ടർ ജനറൽ മേജർ ജനറൽ സുഹൈൽ സഈദ് അൽ ഖൈലി വ്യക്തമാക്കി. നിയമപാലന സംസ്കാരം വളർത്തിയെടുക്കുന്നതിനും, ലംഘകർക്ക് അവരുടെ പദവി ശരിയാക്കാനോ നാടുകടത്തലിനോ വഴിയൊരുക്കുന്ന നടപടികളിലൂടെ ദേശീയ സുരക്ഷയും സാമൂഹിക സ്ഥിരതയും ഉറപ്പാക്കാനാണ് ഐസിപി ശ്രമിക്കുന്നതെന്ന് അദ്ദേഹം പറഞ്ഞു. പിടിയിലായവരിൽ 70% പേരെ നിയമനടപടികൾ പൂർത്തിയാക്കി നാടുകടത്തി, ബാക്കിയുള്ളവരെ തുടർനടപടികൾക്കായി ബന്ധപ്പെട്ട വകുപ്പുകൾക്ക് കൈമാറി.
നിയമലംഘകരെ പിടികൂടാൻ മുഴുവൻ സമയവും പ്രവർത്തിക്കുന്നുണ്ടെന്നും, നിയമലംഘകർക്ക് അഭയം നൽകുന്നവർക്കോ ജോലി നൽകുന്നവർക്കോ ഒരു വിട്ടുവീഴ്ചയും കാണിക്കില്ലെന്നും മേജർ ജനറൽ അൽ ഖൈലി ഊന്നിപ്പറഞ്ഞു. താമസ നിയമങ്ങൾ ലംഘിക്കാൻ സഹായിക്കുന്നവർക്ക് കുറഞ്ഞത് 10,000 ദിർഹം പിഴയും തടവും, ലംഘകരെ ജോലിക്ക് വെക്കുന്നവർക്ക് 50,000 ദിർഹം പിഴയും ശിക്ഷയായി ലഭിക്കും. ലംഘകൻ തന്റെ സ്പോൺസറല്ലാത്ത മറ്റൊരാൾക്ക് വേണ്ടി ജോലി ചെയ്യുന്നതായി കണ്ടെത്തിയാൽ, അവരെ കസ്റ്റഡിയിലെടുത്ത് ജുഡീഷ്യറിക്ക് കൈമാറും, തടവ്, നാടുകടത്തൽ, യുഎഇയിൽ വീണ്ടും പ്രവേശിക്കുന്നതിനുള്ള വിലക്ക് എന്നിവ ശിക്ഷയായി ലഭിച്ചേക്കാം.
