ജിദ്ദ – എക്‌സ്‌റേ (റേഡിയോളജി), ലബോറട്ടറി, ഫിസിയോ തെറാപ്പി, ന്യൂട്രീഷന്‍ തൊഴിലുകളില്‍ ഏപ്രില്‍ 17 മുതല്‍ മാനവശേഷി, സാമൂഹിക വികസന മന്ത്രാലയം നിര്‍ബന്ധിത സൗദിവല്‍ക്കരണം നടപ്പാക്കി തുടങ്ങും. റേഡിയോളജി പ്രൊഫഷനില്‍ 65 ശതമാനവും ലബോറട്ടറി പ്രൊഫഷനുകളില്‍ 70 ശതമാനവും ഫിസിയോ തെറാപ്പി, ചികിത്സാ പോഷകാഹാരം എന്നീ പ്രൊഫഷനുകളില്‍ 80 ശതമാനവും സൗദിവല്‍ക്കരണമാണ് നിര്‍ബന്ധമാക്കുന്നത്.
രണ്ടു ഘട്ടങ്ങളായാണ് ഈ നാലു തൊഴിലുകളില്‍ സൗദിവല്‍ക്കരണം നടപ്പാക്കുന്നത്. ആദ്യ ഘട്ടത്തില്‍ റിയാദ്, മക്ക, ജിദ്ദ, ദമാം, അല്‍കോബാര്‍ എന്നീ പ്രധാന നഗരങ്ങളിലെ മുഴുവന്‍ സ്ഥാപനങ്ങള്‍ക്കും മറ്റു പ്രവിശ്യകളിലെ വന്‍കിട സ്ഥാപനങ്ങള്‍ക്കും സൗദിവല്‍ക്കരണ തീരുമാനം ബാധകമായിരിക്കും. ഒക്‌ടോബര്‍ 17 ന് നിലവില്‍വരുന്ന രണ്ടാം ഘട്ടത്തില്‍ സൗദിയിലെ എല്ലാ പ്രവിശ്യകളിലെയും മുഴുവന്‍ സ്ഥാപനങ്ങള്‍ക്കും ഇത് ബാധകമായിരിക്കും.
