ദുബായ് : ഇന്ത്യക്കാര്‍ക്കുള്ള വിസ ഓണ്‍ അറൈവല്‍ പദ്ധതി കൂടുതല്‍ ഉദാരമാക്കി യുഎഇ ഭരണകൂടം. ആറ് പുതിയ രാജ്യങ്ങളില്‍ നിന്നുള്ള സാധുവായ വിസകള്‍, താമസ പെര്‍മിറ്റുകള്‍, ഗ്രീന്‍ കാര്‍ഡുകള്‍ എന്നിവയില്‍ ഏതെങ്കിലുമൊന്ന് ഉള്ളവരെ കൂടി ഉള്‍പ്പെടുത്തിയാണ് ഇന്ത്യന്‍ പൗരന്മാര്‍ക്കുള്ള വിസ ഓണ്‍ അറൈവല്‍ പ്രോഗ്രാം യുഎഇ വിപുലീകരിച്ചത്.
ഇതുപ്രകാരം 2025 ഫെബ്രുവരി 13 മുതല്‍ പദ്ധതി നിലവില്‍ വന്നു. ഇതുപ്രകാരം, സിംഗപ്പൂര്‍, ജപ്പാന്‍, ദക്ഷിണ കൊറിയ, ഓസ്ട്രേലിയ, ന്യൂസിലന്‍ഡ്, കാനഡ എന്നീ രാജ്യങ്ങളില്‍ നിന്നുള്ള സാധാരണ പാസ്പോര്‍ട്ടുകളും സാധുവായ വിസകളും താമസ പെര്‍മിറ്റുകളും ഗ്രീന്‍ കാര്‍ഡുകളും കൈവശമുള്ള ഇന്ത്യന്‍ പൗരന്മാര്‍ക്ക് യുഎഇയിലെ എല്ലാ പ്രവേശന പോയിന്റുകളിലും മുന്‍ കൂര്‍ വിസയില്ലാതെ പ്രവേശനം അനുവദിക്കും.
നേരത്തേ യുണൈറ്റഡ് സ്റ്റേറ്റ്‌സ്, യൂറോപ്യന്‍ യൂണിയന്‍ അംഗരാജ്യങ്ങള്‍, യുണൈറ്റഡ് കിംഗ്ഡം എന്നിവിടങ്ങളില്‍ നിന്നുള്ള വിസകളും ഗ്രീന്‍കാര്‍ഡുകളും മറ്റു രേഖകളുമുള്ള ഇന്ത്യക്കാര്‍ക്ക് മാത്രമേ വിസ ഓണ്‍ അറൈവല്‍ സംവിധാനം അനുവദിച്ചിരുന്നുള്ളൂ. എന്നാല്‍ പൂതിയ തീരുമാനത്തോടെ ഈ ആറ് രാജ്യങ്ങളില്‍ നിന്നുള്ള ഇന്ത്യക്കാര്‍ക്കു കൂടി ഈ ആനുകൂല്യം ലഭിക്കും. ഇവിടങ്ങളിലെ താമസക്കാരായ ഇന്ത്യന്‍ പൗരന്‍മാര്‍ക്കു പുറമെ, അവരുടെ കുടുംബാംഗങ്ങള്‍ക്കും ഓണ്‍ അറൈവല്‍ വിസ ലഭിക്കുമെന്ന് അധികൃതര്‍ അറിയിച്ചു. 14 ദിവസത്തെ പ്രവേശന വിസ നല്‍കുന്നതിനുള്ള ഫീസ് 100 ദിര്‍ഹമാണ്. 14 ദിവസത്തേക്ക് കൂടി വിസ നീട്ടുന്നതിനുള്ള ഫീസ് 250 ദിര്‍ഹമാണ്. 60 ദിവസത്തെ വിസ നല്‍കുന്നതിനുള്ള ഫീസും 250 ദിര്‍ഹമാണ്.
യോഗ്യരായ ഇന്ത്യന്‍ യാത്രക്കാര്‍ക്ക് യുഎഇയിലെ എല്ലാ അംഗീകൃത എന്‍ട്രി പോയിന്റുകളിലും വിസ ഓണ്‍ അറൈവല്‍ അനുവദിക്കുമെന്ന് ഫെഡറല്‍ അതോറിറ്റി ഫോര്‍ ഐഡന്റിറ്റി, സിറ്റിസണ്‍ഷിപ്പ്, കസ്റ്റംസ്, പോര്‍ട്ട്‌സ് സെക്യൂരിറ്റി (ഐസിപി) പ്രഖ്യാപിച്ചു. എന്നാല്‍ ഓണ്‍ അറൈവല്‍ വിസ ലഭിക്കാന്‍ യോഗ്യത നേടണമെങ്കില്‍ യാത്രക്കാര്‍ കുറഞ്ഞത് ആറ് മാസത്തേക്ക് സാധുതയുള്ള പാസ്പോര്‍ട്ടുകള്‍ കൈവശം വയ്ക്കുകയും പ്രാദേശിക നിയന്ത്രണങ്ങള്‍ക്കനുസൃതമായി ബാധകമായ വിസ ഫീസ് അടയ്ക്കുകയും വേണം. ഇതുപ്രകാരം, ഈ രാജ്യങ്ങളില്‍ താമസക്കാരായ ഇന്ത്യക്കാര്‍ യുഎഇ അതിര്‍ത്തികളില്‍ എത്തിയാല്‍ അവിടെ നിന്ന് നിമിഷങ്ങള്‍ക്കകം പ്രവേശന വിസ അനുവദിക്കും. മുന്‍കൂട്ടി വിസ എടുക്കാതെ ഇവര്‍ക്ക് യുഎഇയില്‍ പ്രവേശിക്കാന്‍ കഴിയും എന്നതാണ് ഇതിന്റെ സൗകര്യം.
ഇന്ത്യക്കാര്‍ക്കുള്ള വിസ ഓണ്‍ അറൈവല്‍ പദ്ധതി വിപുലീകരണം യുഎഇയുടെ ഇന്ത്യയുമായുള്ള ദീര്‍ഘകാല ബന്ധത്തെ പ്രതിഫലിപ്പിക്കുന്നുവെന്ന് ഐസിപി പ്രസ്താവനയില്‍ അറിയിച്ചു. കൂടാതെ യോഗ്യരായ ഇന്ത്യന്‍ പൗരന്മാരുടെയും അവരുടെ കുടുംബങ്ങളുടെയും യാത്ര സുഗമമാക്കാനും രാജ്യത്ത് താമസിക്കാനും ജോലി ചെയ്യാനും നിക്ഷേപിക്കാനുമുള്ള പുതിയ സാധ്യതകള്‍ പര്യവേക്ഷണം ചെയ്യാനുള്ള അവസരങ്ങള്‍ നല്‍കാനും യുഎഇ ലക്ഷ്യമിടുന്നു. ആഗോള സാമ്പത്തിക, ടൂറിസം കേന്ദ്രമെന്ന നിലയില്‍ യുഎഇയുടെ സ്ഥാനം കൂടുതല്‍ ശക്തിപ്പെടുത്തുന്നതിനും വൈദഗ്ധ്യമുള്ള പ്രൊഫഷണലുകളെയും സംരംഭകരെയും ആകര്‍ഷിക്കുന്നതിനുമുള്ള യുഎഇയുടെ തന്ത്രപരമായ ശ്രമങ്ങളുടെ ഭാഗമാണ് ഈ വിപുലീകരണ പദ്ധതിയെന്നും ഐസിപി അറിയിച്ചു.
