കുവൈറ്റ് സിറ്റി: രാജ്യത്ത് കെട്ടിടങ്ങളിൽ തീപ്പിടിത്ത സംഭവങ്ങൾ വർധിച്ചു വരുന്ന സാഹചര്യത്തിൽ അഗ്നി സംരക്ഷാ പരിശോധകൾ കർശനമാക്കി പബ്ലിക് ഫയർ സർവീസ് ഫോഴ്സ് (പിഎഫ്എസ്). പരിശോധനയിൽ സുരക്ഷാ വീഴ്ചകൾ ശ്രദ്ധയിൽ പെട്ടതിനെ തുടർന്ന ഈ ആഴ്ച വിവിധ ഗവർണറേറ്റുകളിലുടനീളമുള്ള 258 കടകളും വ്യാപാര സ്ഥാപനങ്ങളും അടച്ചുപൂട്ടുന്നതായി അധികൃതർ പ്രഖ്യാപിച്ചു.
നേരത്തേ പല തവണ മുന്നറിയിപ്പുകൾ നൽകിയിരുന്നു എങ്കിലും ആവശ്യമായ തീപിടിത്ത പ്രതിരോധ മാനദണ്ഡങ്ങൾ പാലിക്കുന്നതിൽ ബിസിനസ് സ്ഥാപനങ്ങൾ പരാജയപ്പെട്ടതിൻ്റെ ഫലമായാണ് അടച്ചുപൂട്ടൽ നടപടിയെന്ന്പ ബ്ലിക് ഫയർ സർവീസ് ഫോഴ്സ് പ്രസ്താവനയിൽ അറിയിച്ചു. പല സ്ഥാപനങ്ങൾക്കും ആവശ്യമായ അഗ്നിശമന ലൈസൻസ് ലഭിക്കാൻ ആവശ്യമായ മാർഗനിർദ്ദേശങ്ങൾ പാലിക്കാത്തത് ജീവനക്കാരെയും ഉപഭോക്താക്കളെയും അപകടത്തിലാക്കിയതായും അധികൃതർ പ്രസ്താവനയിൽ അറിയിച്ചു.
ബിസിനസ് സ്ഥാപനങ്ങൾ അവശ്യ സുരക്ഷാ നടപടികളും നിയമപരമായ ആവശ്യകതകളും പാലിക്കുന്നുണ്ടെന്ന് ഉറപ്പുവരുത്തുന്നതിലൂടെ ജനങ്ങളുടെ ജീവനും സ്വത്തുക്കളും സംരക്ഷിക്കുന്നതിൻ്റെ ഭാഗമായാണ് അടച്ചു പൂട്ടലുകൾ ഉൾപ്പെടെയുള്ള നടപടികളിലൂടെ ലക്ഷ്യമിടുന്നതെന്നും അധികൃതർ അറിയിച്ചു.
രാജ്യത്തുടനീളമുള്ള ബിസിനസുകളെ സജീവമായി നിരീക്ഷിക്കുകയും മുന്നറിയിപ്പുകൾ നൽകുകയും അഗ്നി സുരക്ഷാ പ്രോട്ടോക്കോളുകൾ പാലിക്കുന്നുണ്ടെന്ന് ഉറപ്പാക്കാൻ പരിശോധനകൾ നടത്തുകയും ചെയ്യുന്നത് തുടരുമെന്നും പബ്ലിക് ഫയർ സർവീസ് ഫോഴ്സ് വ്യക്തമാക്കി.
ഈ അടച്ചുപൂട്ടലുകൾ ബിസിനസ്സ് പ്രവർത്തനങ്ങളെ തടസ്സപ്പെടുത്തുമെങ്കിലും, എല്ലാ വാണിജ്യ സ്ഥാപനങ്ങളും അഗ്നി സുരക്ഷാ മാനദണ്ഡങ്ങൾ പാലിക്കേണ്ടതിൻ്റെ ആവശ്യകതയാണ് ഈ നടപടിയിലൂടെ വ്യക്തമാകുന്നത്. അഗ്നിശമന ലൈസൻസ് നേടുകയും സുരക്ഷാ സംവിധാനങ്ങൾ ഒരുക്കുകയും ചെയ്യുന്നതിലൂടെ നിയമം പാലിക്കുന്നത് ഉറപ്പാക്കുക മാത്രമല്ല, ഉപഭോക്താക്കൾ, ജീവനക്കാർ, സ്വത്ത് എന്നിവയുടെ സുരക്ഷ കൂടിയാണ് ഉറപ്പാക്കുന്നതെന്നും അധികൃതർ അറിയിച്ചു.
