അബുദാബി – ബിസിനസ്, തൊഴില്‍ മേഖലകളില്‍ ഗള്‍ഫ് പൗരന്മാര്‍ക്ക് സ്വദേശികളുടെ അതേ പരിഗണനയും അവകാശങ്ങളും നല്‍കുന്ന ഫെഡറല്‍ നിയമം യു.എ.ഇ ഗവണ്‍മെന്റ് പ്രഖ്യാപിച്ചു. ഒക്‌ടോബര്‍ ഒന്നു മുതല്‍ പ്രാബല്യത്തില്‍വന്ന പുതിയ നിയമം ഗള്‍ഫ് രാജ്യങ്ങളിലെ പൗരന്മാരെ, വ്യക്തികളായാലും സ്ഥാപനങ്ങളായാലും, യു.എ.ഇയിലെ സാമ്പത്തിക പ്രവര്‍ത്തനങ്ങളിലും തൊഴിലുകളിലും രാജ്യത്തെ പൗരന്മാരെയും സ്ഥാപനങ്ങളെയും പോലെ കണക്കാക്കണമെന്ന് വ്യവസ്ഥ ചെയ്യുന്നു.
ജി.സി.സി സുപ്രീം കൗണ്‍സില്‍ തീരുമാന പ്രകാരവും യു.എ.ഇ മന്ത്രിസഭാ തീരുമാന പ്രകാരവും നിര്‍ണയിക്കുന്ന ബിസിനസുകളും തൊഴിലുകളും ഇതില്‍ നിന്ന് ഒഴിവാക്കിയിട്ടുണ്ട്.
ഗള്‍ഫ് പൗരന്മാര്‍ യു.എ.ഇയില്‍ ബിസിനസ് മേഖലയില്‍ പ്രവര്‍ത്തിക്കുന്നതുമായി ബന്ധപ്പെട്ട് 1984 ല്‍ പുറപ്പെടുവിച്ച രണ്ടാം നമ്പര്‍ ഫെഡറല്‍ നിയമം റദ്ദാക്കിയാണ് ഗള്‍ഫ് പൗരന്മാര്‍ക്ക് യു.എ.ഇ പൗരന്മാരുടെ അതേ അവകാശങ്ങളും പരിഗണനയും നല്‍കുന്ന പുതിയ നിയമം പ്രഖ്യാപിച്ചിരിക്കുന്നത്.
