കുവൈറ്റ് സിറ്റി: കുവൈറ്റില്‍ മയക്കുമരുന്ന് കടത്തും വിതരണവും തടയുന്നതിന്റെ ഭാഗമായുള്ള നടപടികള്‍ കൂടുതല്‍ വ്യാപകമാക്കി ആഭ്യന്തര മന്ത്രാലയം. മയക്കുമരുന്ന് കടത്തും സൈക്കോട്രോപിക് ലഹരിവസ്തുക്കളുടെ ദുരുപയോഗവും തടയുന്നതിനായാണ് റെയ്ഡ് ഉൾപ്പെടെയുള്ള നടപടികൾ കർശനമാക്കിയത്. റെയ്ഡിൽ നിരവധിയാളുകൾ പിടിയിലായി. കുവൈറ്റിലെ ക്രിമിനല്‍ സെക്യൂരിറ്റി സെക്ടര്‍ ജനറല്‍ ഡിപ്പാര്‍ട്ട്മെന്റ് ഫോര്‍ കോംബാറ്റിങ് നാര്‍ക്കോട്ടിക്‌സിന്റെ നേതൃത്വത്തിലാണ് രാജ്യത്തൊട്ടാകെ റെയ്ഡ് നടത്തിയത്.
വ്യാപക റെയ്ഡിൽ വിവിധയിടങ്ങളിൽ നിന്ന് വന്‍ തോതില്‍ മയക്കുമരുന്ന് പിടികൂടിയതായി അധികൃതര്‍ അറിയിച്ചു. രാജ്യത്തിന്റെ വിവിധ ഭാഗങ്ങളില്‍ നിന്നായി 23 പേരാണ് ഒറ്റ ദിവസം കൊണ്ട് പിടിയിലായത്. മയക്കുമരുന്ന് കൈവശം വച്ചതിനും വിതരണം ചെയ്തതിനുമാണ് ഇത്രയും പേര്‍ പിടിയിലായത്. അന്വേഷണത്തിന് വന്‍ മയക്കുമരുന്ന് വിതരണ ശൃംഖല കണ്ടെത്തിയതായും അധികൃതര്‍ അറിയിച്ചു. ഇവരില്‍ നിന്ന് 42 കിലോ ഗ്രാം വിവിധ മയക്കുമരുന്നുകളും 9,000 സൈക്കോട്രോപിക് ഗുളികകളും കണ്ടെടുക്കാന്‍ സാധിച്ചതായും ആഭ്യന്തര മന്ത്രാലയം അറിയിച്ചു.
മയക്കുമരുന്ന് വില്‍പ്പനയില്‍ നിന്നുള്ള വരുമാനമെന്ന് കരുതുന്ന പണവും അധികൃതര്‍ പിടിച്ചെടുത്തു. 17 വ്യത്യസ്ത കേസുകളില്‍ പിടിയിലായ പ്രതികള്‍ യക്കുമരുന്ന് കടത്ത് മുതല്‍ വ്യക്തിഗത ഉപഭോഗം വരെയുള്ള പ്രവര്‍ത്തനങ്ങളില്‍ ഏര്‍പ്പെട്ടിരുന്നതായി കണ്ടെത്തി. പ്രാഥമിക ചോദ്യം ചെയ്യലില്‍ പ്രതികള്‍ തങ്ങളുടെ പങ്കാളിത്തം സമ്മതിച്ചു. ചിലരില്‍ നിന്ന് പിടിച്ചെടുത്ത മയക്കുമരുന്നുകള്‍ പ്രാദേശിക വിപണിയില്‍ വിതരണം ചെയ്യാന്‍ ഉദ്ദേശിച്ചുള്ളവയാണെന്ന് സമ്മതിച്ചു.
കഴിഞ്ഞ ദിവസം രാജ്യത്തെ മയക്കുമരുന്ന് വ്യാപനം തടയുന്നതിന് ശക്തമായ ക്യാമ്പയിന്‍ ആരംഭിക്കേണ്ട ആവശ്യകത മന്ത്രിസഭാ യോഗം ചര്‍ച്ച ചെയ്തിരുന്നു. ഇതേത്തുടര്‍ന്നാണ് രാജ്യവ്യാപകമായി പരിശോധനാ റെയ്ഡുകൾ ആരംഭിച്ചത്. പരിശോധനകള്‍ വന്‍ വിജയമായിരുന്നുവെന്നും മയക്കുമരുന്ന് കടത്തുന്ന ഏജന്‍സികളെയും വിതരണ ശൃംഖലയെയും കണ്ടെത്താന്‍ പരിശോധനയിലൂടെ സാധിച്ചതായും അധികൃതര്‍ വ്യക്തമാക്കി. രാജ്യത്ത് മയക്കുമരുന്ന് ഉപയോഗവും അതുമൂലമുള്ള മരണം ഉള്‍പ്പെടെയുള്ള പ്രശ്‌നങ്ങളും വലിയ തോതില്‍ വര്‍ധിച്ചുവരുന്നതായുള്ള റിപ്പോര്‍ട്ടുകളെ തുടര്‍ന്നായിരുന്നു ഇതിനെതിരായ നടപടികള്‍ ശക്തമാക്കിയത്.
രാജ്യവ്യാപക ഓപ്പറേഷനില്‍ അറസ്റ്റിലായ പ്രതികളെയും പിടിച്ചെടുത്ത മയക്കുമരുന്നുകളും നിയമനടപടികള്‍ക്കായി ബന്ധപ്പെട്ട അധികാരികള്‍ക്ക് റഫര്‍ ചെയ്തു. മയക്കുമരുന്ന്, സൈക്കോട്രോപിക് ലഹരിവസ്തുക്കള്‍ എന്നിവയുടെ നിയമവിരുദ്ധ വ്യാപാരത്തില്‍ ഏര്‍പ്പെട്ടിരിക്കുന്ന നെറ്റ്വര്‍ക്കുകള്‍ കണ്ടെത്തി തകര്‍ക്കാനുള്ള നീക്കങ്ങള്‍ വരുംദിനങ്ങളില്‍ കൂടുതല്‍ ശക്തമാക്കുമെന്നും അധികൃതര്‍ വ്യക്തമാക്കി.
