റിയാദ്: സൗദി അറേബ്യയില്‍ ശക്തമായ ഇടിമിന്നലോട് കൂടിയ മഴയ്ക്ക് സാധ്യത പ്രവചിപ്പിക്കപ്പെട്ടിരിക്കുന്ന സാഹചര്യത്തില്‍ ജനങ്ങള്‍ ജാഗ്രത പാലിക്കണമെന്ന് സൗദി സിവില്‍ ഡിഫന്‍സ് ജനറല്‍ ഡയറക്ടറേറ്റ് മുന്നറിയിപ്പ് നല്‍കി. രാജ്യത്തിന്റെ വിവിധ മേഖലകളെ ബാധിക്കുന്ന പ്രതികൂല കാലാവസ്ഥ ചൊവ്വാഴ്ച വരെ തുടരുമെന്ന് പ്രതീക്ഷിക്കുന്നതായും അധികൃതര്‍ അറിയിച്ചു. ശക്തമായ മഴയ്‌ക്കൊപ്പം ചുഴലിക്കാറ്റ് അടിച്ചു വീശാനുള്ള സാധ്യതയുമുണ്ട്.
മക്ക, തായിഫ്, മെയ്സാന്‍, അദം, അല്‍ അര്‍ദിയാത്ത് എന്നിവയുള്‍പ്പെടെയുള്ള പ്രദേശങ്ങളെ ബാധിക്കുന്ന കനത്ത മഴയ്ക്കും ആലിപ്പഴ വര്‍ഷത്തിനും ശക്തമായ കാറ്റിനും സാധ്യതയുണ്ടെന്ന് മുന്നറിയിപ്പില്‍ വ്യക്തമാക്കി. അല്‍ ബഹ, അസീര്‍, ജസാന്‍, നജ്റാന്‍ തുടങ്ങിയ പ്രദേശങ്ങളിലും മിതമായതോ കനത്തതോ ആയ മഴയും മദീനയില്‍ നേരിയതോ മിതമായതോ ആയ മഴയും ലഭിക്കാന്‍ സാധ്യതയുണ്ടെന്നും അധികൃതര്‍ അറിയിച്ചു.
ശക്തമായ മഴയ്‌ക്കൊപ്പം ചുഴലിക്കാറ്റ് അടിച്ചു വീശാനുള്ള സാധ്യതയും കാലാവസ്ഥാ നിരീക്ഷണ വിഭാഗം അറിയിച്ചിട്ടുണ്ട്. പ്രതികൂല കാലാവസ്ഥയുള്ള സമയങ്ങളില്‍ വെള്ളപ്പൊക്ക സാധ്യതയുള്ള പ്രദേശങ്ങളും വാദികളും മറ്റ് താഴ്ന്ന ഇടങ്ങളും ഒഴിവാക്കണം. അടിയന്തര സാഹചര്യങ്ങളില്‍ മാത്രമേ ആളുകള്‍ പുറത്തിറങ്ങാവൂ എന്നും വാഹനങ്ങളുമായി പുറത്തിറങ്ങുന്നവര്‍ അതീവ ജാഗ്രത പാലിക്കണമെന്നും സിവില്‍ ഡിഫന്‍സ് ജനറല്‍ ഡയർക്ടറേറ്റ് അറിയിച്ചു.
ശക്തമായ കാറ്റില്‍ പൊടിപടലങ്ങള്‍ ഉയര്‍ന്ന് അന്തരീക്ഷ കാഴ്ചാപരിധി കുറയാന്‍ ഇടയുള്ളതിനാല്‍ വാഹനങ്ങള്‍ തമ്മില്‍ നിശ്ചിത അകലം പാലിച്ച് മാത്രമേ യാത്ര ചെയ്യാവൂ. ഈ അസ്ഥിരമായ സാഹചര്യങ്ങളില്‍ സുരക്ഷ ഉറപ്പാക്കുന്നതിന് ഏറ്റവും പുതിയ കാലാവസ്ഥാ പ്രവചനങ്ങളും അലേര്‍ട്ടുകളും ശ്രദ്ധിക്കുകയും അവയിലെ നിര്‍ദേശങ്ങള്‍ കര്‍ശനമായി പാലിക്കുകയും ചെയ്യണമെന്നും സിവില്‍ ഡിഫന്‍സ് അധികൃതര്‍ പൊതുജനങ്ങളോട് നിര്‍ദേശിച്ചു.
കഴിഞ്ഞ ആഴ്ചയില്‍ പുണ്യ നഗരമായ മക്ക ഉള്‍പ്പെടെയുള്ള പ്രദേശങ്ങളിലുണ്ടായ ശക്തമായ മഴയില്‍ വാഹനങ്ങള്‍ ഒഴുകിപ്പോയതിനെ തുടര്‍ന്നും മറ്റുമായി നിരവധി പേര്‍ മരിച്ചിരുന്നു. നിരവധി വീടുകളും കെട്ടിടങ്ങളും വെള്ളത്തിനടിയിലാവുകയും വാഹനങ്ങള്‍ ഒഴുകിപ്പോവുകയുമുണ്ടായി. ശക്തമായ കാറ്റില്‍ മരങ്ങള്‍ കടപുഴകി വീണും മറ്റും വ്യാപകമായ നാശനഷ്ടങ്ങളാണ് രാജ്യത്തിന്റെ വിവിധ ഭാഗങ്ങളില്‍ റിപ്പോര്‍ട്ട് ചെയ്യപ്പെട്ടത്. പലയിടങ്ങളിലും മലയിടിഞ്ഞും മറ്റും റോഡുകള്‍ക്കും കാര്യമായ കേടുപാടുകള്‍ സംഭവിച്ചിട്ടുണ്ട്. കാലാവസ്ഥാ വ്യതിയാനത്തിന്റെ ഫലമാണ് പതിവിന് വിപരീതമായ ഈ കാലാവസ്ഥാ മാറ്റമെന്നാണ് കാലാവസ്ഥാ നിരീക്ഷകര്‍ വിലയിരുത്തുന്നത്.
