ജിദ്ദ – ഉത്തര സൗദിയിലെ ജിദൈദ അറാര്‍ അതിര്‍ത്തി പോസ്റ്റില്‍ വന്‍ മയക്കുമരുന്ന് വേട്ട. ടൈല്‍സ് പോളിഷിംഗ് ഉപകരണങ്ങള്‍ക്കകത്ത് ഒളിപ്പിച്ച് കടത്തിയ 3,49,710 ലഹരി ഗുളികകള്‍ സകാത്ത്, ടാക്‌സ് ആന്റ് കസ്റ്റംസ് അതോറിറ്റി പിടികൂടി. സുരക്ഷാ സാങ്കേതികവിദ്യകളും പോലീസ് നായ്ക്കളെയും ഉപയോഗിച്ച് നടത്തിയ പരിശോധനയിലാണ് മയക്കുമരുന്ന് ശേഖരം കണ്ടെത്തിയത്.
മയക്കുമരുന്ന് ശേഖരം പിടികൂടിയ ശേഷം ജനറല്‍ ഡയറക്ടറേറ്റ് ഓഫ് നാര്‍കോട്ടിക്‌സ് കണ്‍ട്രോളുമായി ഏകോപനം നടത്തി, മയക്കുമരുന്ന് ശേഖരം സൗദിയില്‍ സ്വീകരിച്ച നാലു പേരെ അറസ്റ്റ് ചെയ്തതായും സകാത്ത്, ടാക്‌സ് ആന്റ് കസ്റ്റംസ് അതോറിറ്റി അറിയിച്ചു.
ദമാം – മയക്കുമരുന്ന് കടത്ത്, കൊലക്കേസ് പ്രതികളായ മൂന്നു സൗദി പൗരന്മാര്‍ക്ക് ഇന്ന് വധശിക്ഷ നടപ്പാക്കിയതായി ആഭ്യന്തര മന്ത്രാലയം അറിയിച്ചു. സൗദിയിലേക്ക് ഹഷീഷ് ശേഖരം കടത്തുന്നതിനിടെ അറസ്റ്റിലായ അലി ബിന്‍ നാസിര്‍ ബിന്‍ അലി അല്‍മരി, ഹമദ് ബിന്‍ സഈദ് ബിന്‍ സാലിം അല്‍മരി എന്നിവര്‍ക്ക് കിഴക്കന്‍ പ്രവിശ്യയിലും സൗദി പൗരന്‍ അബ്ദുല്‍ മുഹ്‌സിന്‍ ബിന്‍ ഹലീല്‍ ബിന്‍ സഫര്‍ അല്‍സായിദിയെ കുത്തിക്കൊലപ്പെടുത്തിയ സാലിം ബിന്‍ സഈദ് ബിന്‍ മസ്ഊദ് അല്‍റബീഇക്ക് മക്ക പ്രവിശ്യയിലുമാണ് ശിക്ഷ നടപ്പാക്കിയത്.
