ദുബായ്: യു.എ.ഇയില് താമസിച്ച് വിദേശത്ത് ജോലി ചെയ്യാന് ആഗ്രഹിക്കുന്ന ബന്ധുക്കളോ സുഹൃത്തുക്കളോ നിങ്ങള്ക്കുണ്ടോ? എങ്കില് അവര്ക്കുള്ളതാണ് യുഎഇ നല്കുന്ന വെര്ച്വല് വര്ക്ക് റെസിഡന്സ് വിസ. വേറെ ഒരു സ്പോണ്സറിന്റെ ആവശ്യമില്ല എന്നതാണ് ഇതിന്റെ സവിശേഷത. ഈ വിസയില് വിദേശികള്ക്ക് യുഎഇയില് ഒരു വര്ഷം വരെ സ്വന്തം സ്പോണ്സര്ഷിപ്പില് താമസിച്ച് വിദേശ കമ്പനിയില് ജോലി ചെയ്യാം. ഈ വിസയില് വരുന്നവര്ക്ക് തന്റെ കുടുംബത്തെ സ്പോണ്സര് ചെയ്യാനും കഴിയും. ഒരു വര്ഷത്തെ കാലാവധിയുള്ള ഈ വിസ വര്ഷം തോറും പുതുക്കാവുന്നതാണെന്നും അധികൃതര് അറിയിച്ചു.
ഫെഡറല് അതോറിറ്റി ഫോര് ഐഡന്റിറ്റി, സിറ്റിസണ്ഷിപ്പ്, കസ്റ്റംസ് ആന്ഡ് പോര്ട്ട്സ് സെക്യൂരിറ്റിയുടെ അറിയിപ്പ് പ്രകാരം, യുഎഇക്ക് പുറത്തുള്ള ഒരു കമ്പനിയില് വിദൂരമായി ജോലി ചെയ്യുന്നവര്ക്കുള്ളതാണ് ഈ വിസ. പ്രതിമാസം കുറഞ്ഞത് 3,500 ഡോളര് അല്ലെങ്കില് അതിന് തുല്യമായ തുക വരുമാനം ഉണ്ടായിരിക്കണമെന്നും നിബന്ധനയുണ്ട്. റിമോട്ട് രീതിയില് ജോലി ചെയ്യുന്ന വിദേശികള്ക്ക് മാത്രമല്ല, യോഗ്യതാ മാനദണ്ഡങ്ങള് പാലിക്കുന്ന സംരംഭകര്ക്കും സ്റ്റാര്ട്ടപ്പുകള്ക്കും ഈ വിസ പ്രയോജനപ്പെടുത്താം.
യുഎഇ പാസ് ഉപയോഗിച്ചോ ആമിര് കേന്ദ്രങ്ങള് വഴിയോ വിസയ്ക്ക് ഓണ്ലൈനായി അപേക്ഷിക്കാം. പാസ്പോര്ട്ട്, ഫോട്ടോ, ജോലിയുടെയും വരുമാനത്തിന്റെയും തെളിവ്, ആരോഗ്യ ഇന്ഷുറന്സ് തുടങ്ങിയ രേഖകള് അപ്ലോഡ് ചെയ്യണം. ഐസിപി വെബ്സൈറ്റ്, അതിന്റെ സ്മാര്ട്ട് സര്വീസ് സിസ്റ്റം, മൊബൈല് ആപ്പ് എന്നിവ വഴിയും അപേക്ഷ സമര്പ്പിക്കാം. യുഎഇക്കു പുറത്തുവച്ചും അപേക്ഷ നല്കാനാവും. വിസ ഇഷ്യു ചെയ്തുകഴിഞ്ഞാല്, അപേക്ഷകന് 60 ദിവസത്തിനുള്ളില് യുഎഇയില് പ്രവേശിക്കണം.
350 ദിര്ഹമാണ് വിസയുടെ ആകെ ചിലവ്. അപേക്ഷ അപൂര്ണ്ണമാണെങ്കില് അപേക്ഷ തിരിച്ചയക്കും. ആവശ്യമായ മാറ്റങ്ങള് വരുത്തി അത് വീണ്ടും 30 ദിവസത്തിനകം സമര്പ്പിച്ചില്ലെങ്കില് അപേക്ഷ നിരസിക്കപ്പെടും. ഇങ്ങനെ മൂന്ന് തവണ തിരിച്ചയക്കപ്പെടുന്ന അപേക്ഷ പിന്നീട് പരിഗണിക്കില്ല. അപേക്ഷ നിരസിക്കപ്പെട്ടാല്, വിസ ഇഷ്യൂ ഫീസായ 100 ദിര്ഹം മാത്രമേ തിരികെ ലഭിക്കൂ. ഈ തുക ആറ് മാസത്തിനുള്ളില് ക്രെഡിറ്റ് കാര്ഡ് വഴി റീഫണ്ട് ലഭിക്കും.
അടുത്തായി എടുത്ത വെള്ള പശ്ചാത്തലത്തിലുള്ള കളര് ഫോട്ടോ, കുറഞ്ഞത് ആറ് മാസം കാലാവധിയുള്ള പാസ്പോര്ട്ടിന്റെ കോപ്പി, യുഎഇക്ക് പുറത്തുള്ള ഒരു സ്ഥാപനത്തില് റിമോര്ട്ട് രീതിയില് ജോലി ചെയ്യുന്നു എന്നതിന്റെ തെളിവ്, 3,500 ഡോളറില് കുറയാത്ത പ്രതിമാസ വരുമാനത്തിന്റെ തെളിവ്, സാധുവായ ആരോഗ്യ ഇന്ഷുറന്സ് എന്നിവയാണ് വിസ അപേക്ഷിക്കാന് വേണ്ട രേഖകള്.
Leave a Reply