അബുദാബിയിൽ ബിസിനസ് ആരംഭിക്കാൻ തയ്യാറെടുക്കുന്നവര്‍ക്ക് സന്തോഷ വാര്‍ത്ത. നോൺ-ഫിനാൻഷ്യൽ സ്ഥാപനങ്ങളുടെയും റീട്ടെയിൽ വ്യാപാര സ്ഥാപനങ്ങളുടെയും രജിസ്ട്രേഷൻ ഫീസ് 50 ശതമാനത്തോളം കുറച്ചിരിക്കുകയാണ് അബുദാബി ഗ്ലോബൽ മാർക്കറ്റ്. എഡിജിഎം എന്ന ചുരുക്കപ്പേരിൽ അറിയപ്പെടുന്ന അബുദാബി ഗ്ലോബൽ മാര്‍ക്കറ്റിൻ്റെ അധികാര പരിധിയിൽ വരുന്ന മേഖലകളിൽ 2025 ജനുവരി 1 മുതൽ പുതുക്കിയ ലൈസൻസ് ഫീസ് ഘടന പ്രാബല്യത്തിൽ വരും.
യുഎഇയുടെ തലസ്ഥാന നഗരമായ അബുദാബിയിലെ ആഗോള സാമ്പത്തിക കേന്ദ്രമാണ് അബുദാബി ഗ്ലോബൽ മാര്‍ക്കറ്റ് (ADGM). അൽ മറിയ ദ്വീപും അൽ റീം ദ്വീപുമാണ് എഡിജിഎമ്മിൻ്റെ അധികാര പരിധിയിൽ ഉൾപ്പെടുന്നത്. പുതുക്കിയ ഫീസ് ഘടന പ്രകാരം നോൺ ഫിനാൻഷ്യൽ വിഭാഗത്തിലെ രജിസ്ട്രേഷനുകൾക്കുള്ള ഫീസ് 10,000 ഡോളറിൽ നിന്ന് 5,000 ഡോളറായായായി കുറയും. അതോടൊപ്പം വാർഷിക ലൈസൻസ് പുതുക്കൽ ഫീസായി നിലവിലുള്ള 8,000 ഡോളറിന് പകരം 5,000 ഡോളര്‍ നൽകിയാൽ മതിയാകും.
റീട്ടെയിൽ വ്യാപാര രജിസ്ട്രേഷന് വേണ്ടിയുള്ള ഫീസും വലിയ അളവിൽ കുറച്ചിട്ടുണ്ട്. റീട്ടെയിൽ സ്ഥാപനങ്ങളുടെ പുതിയ രജിസ്ട്രേഷൻ ഫീസ് 6,000 ഡോളറിൽ നിന്ന് 2,000 ഡോളറായാണ് കുറയുക. റീട്ടെയിൽ വ്യാപാര വിഭാഗത്തിനുള്ള ലൈസൻസ് പുതുക്കൽ ഫീസും 50 ശതമാനം കുറച്ച് 2,000 ഡോളറാക്കി മാറ്റിയിട്ടുണ്ട്. നിലവിലുള്ള ഫീസ് ഘടന ഡിസംബർ 31-ന് അവസാനിക്കുന്നതിനാലാണ് പുതുക്കിയ ലൈസൻസ് ഫീസിന്റെ പ്രാബല്യ തീയതി അടുത്ത വര്‍ഷം ജനുവരി 1 ആയി നിശ്ചയിക്കുന്നത്.
അൽ റീം ദ്വീപിൽ സ്ഥിതി ചെയ്യുന്ന, പ്രത്യേക യോഗ്യതയുള്ള നോൺ-ഫിനാൻഷ്യൽ സ്ഥാപനങ്ങളും ചില്ലറ വ്യാപാര സ്ഥാപനങ്ങളും ഈ വര്‍ഷം ഒക്ടോബർ 31 വരെ ADGM വാണിജ്യ ലൈസൻസ് നേടാൻ ഫീസൊന്നും നൽകേണ്ടതില്ലാതിയിരുന്നു. ഇത്തരത്തിൽ ഫീ ഇളവ് നേടിയിട്ടുള്ള ബിസിനസ് സ്ഥാപനങ്ങളുടെ ട്രാൻസിഷണൽ അറേഞ്ച്മെൻ്റിൻ്റെ ഭാഗമായാണ് രജിസ്ട്രേഷൻ ഫീ ഘടനയിലെ മാറ്റം വരുത്തുന്നത്.
യുഎഇയിൽ ഈ നിയമലംഘനങ്ങൾക്ക് 20,000 ദിർഹം വരെ പിഴ ലഭിച്ചേക്കും
മേഖലയിലെ മറ്റു വിഭാഗങ്ങളിൽ രജിസ്ട്രേഷൻ ഫീസ് വര്‍ധിപ്പിച്ചിരിക്കുകയാണ്. ധനകാര്യ സ്ഥാപനങ്ങളുടെ രജിസ്ട്രേഷൻ ഫീ 15,000 ഡോളറിൽ നിന്ന് 20,000 ഡോളറായി വർദ്ധിപ്പിക്കാനാണ് തീരുമാനം. ഇവയുടെ ലൈസൻസ് പുതുക്കുന്നതിനുള്ള ഫീസ് 13,000 ഡോളറിൽ നിന്ന് 15,000 ഡോളറായാണ് വർദ്ധിക്കുക. ടെക്, ഫിൻ-ടെക് സ്റ്റാർട്ടപ്പുകൾ പുതിയ ലൈസൻസ് നേടുന്നതിനും നിലവിലുള്ള ലൈസൻസ് പുതുക്കുന്നതിനും ജനുവരി ഒന്ന് മുതൽ 1500 ഡോളര്‍ ഫീ ആയി നൽകണം. നിലവിൽ അത് 1,000 ഡോളറായിരുന്നു. അതേ സമയം, സ്പെഷ്യൽ പർപ്പസ് വെഹിക്കിൾ അഥവാ SPV വിഭാഗത്തിന്റെ ഫീസ് 1,900 ഡോളറായി തന്നെ തുടരും.
അൽ റീം ദ്വീപിലെ ബിസിനസ് സ്ഥാപനങ്ങളുടെ ഗ്രൂപ്പുമായി 2023-ൽ നടത്തിയ വിവിധ ചര്‍ച്ചകളുടെ അടിസ്ഥാനത്തിലാണ് ഫീ ഘടനയിൽ മാറ്റം വരുത്തുന്നതെന്ന് അബുദാബി ഗ്ലോബൽ മാര്‍ക്കറ്റ് അധികൃതര്‍ വ്യക്തമാക്കി. ചില പ്രത്യേക കാറ്റഗറികളിലുള്ള ബിസിനസ് സ്ഥാപനങ്ങളുടെ സാമ്പത്തിക സാഹചര്യത്തെ കുറിച്ച് പഠനം നടത്തിയതിന് ശേഷമാണ് യോഗ്യതയുള്ള നോൺ-ഫിനാൻഷ്യൽ, റീട്ടെയിൽ ബിസിനസ് സ്ഥാപനങ്ങളുടെ രജിസ്ട്രേഷൻ ഫീ നേരത്തെ ഒഴിവാക്കിയത്.
ഇതിന് ശേഷം നടത്തിയ നിരവധി ചര്‍ച്ചകൾക്കും പഠനങ്ങൾക്കുമൊടുവിലാണ് ഫീസ് ഘടനയിൽ മാറ്റം വരുത്തുന്നതെന്ന് അബുദാബി ഗ്ലോബൽ മാര്‍ക്കറ്റ് രജിസ്ട്രേഷൻ അതോറിറ്റി സിഇഒ ഹമദ് സായഹ് അൽ മസ്രൂയി പറ‌ഞ്ഞു. എഡിജിഎം ലൈസൻസിലേക്ക് മാറുന്നതിന് കമ്പനികൾ നേരിടുന്ന തടസ്സം കുറക്കുന്നതും എഡിജിഎം അധികാര പരിധിയിൽ കാര്യക്ഷമതയോടെ പ്രവര്‍ത്തിക്കാൻ സ്ഥാപനങ്ങളെ സഹായിക്കുക എന്നതുമാണ് തങ്ങളുടെ ലക്ഷ്യമെന്ന് അദ്ദേഹം കൂട്ടിച്ചേര്‍ത്തു.
