കുവൈറ്റ് ഭരണകൂടം കോവിഡ് കാലത്ത് നിര്‍ത്തിവച്ച ഫാമിലി റെസിഡന്‍സ് വിസകള്‍ ഈ വര്‍ഷം ജനുവരി അവസാനത്തിലാണ് വീണ്ടും അനുവദിച്ചു തുടങ്ങിയത്. ഭാര്യ, ഭര്‍ത്താവ്, മക്കള്‍ എന്നിങ്ങനെ നേരിട്ട് ബന്ധമുള്ള കുടുംബാംഗങ്ങള്‍ക്ക് മാത്രമാണ് അനുമതി. ഇതിന് ചുരുങ്ങിയത് 800 ദിനാര്‍ മാസശമ്പളം വാങ്ങുന്നയാളായിരിക്കണം സ്‌പോണ്‍സര്‍.
വിസ അപേക്ഷകനായ സ്‌പോണ്‍സര്‍ക്ക് കുവൈറ്റിലെ തങ്ങളുടെ പ്രവര്‍ത്തന മേഖലയുമായി ബന്ധപ്പെട്ട വിഷയത്തില്‍ യൂണിവേഴ്‌സിറ്റി ബിരുദം ഉണ്ടായിരിക്കണമെന്നും വ്യവസ്ഥയുണ്ട്. എന്നാല്‍ ചില തൊഴില്‍ മേഖലകളില്‍ പ്രവര്‍ത്തിക്കുന്നവരെ ഈ നിബന്ധനയില്‍ നിന്ന് ഒഴിവാക്കിയിട്ടുണ്ട്.
അവ ആരൊക്കെയാണെന്ന് പരിശോധിക്കാം:-
– സര്‍ക്കാര്‍ മേഖലയിലെ ഉപദേശകര്‍, ജഡ്ജിമാര്‍, പ്രോസിക്യൂട്ടര്‍മാര്‍, വിദഗ്ധര്‍, നിയമ ഗവേഷകര്‍;
– ഡോക്ടര്‍മാരും ഫാര്‍മസിസ്റ്റുകളും ഉള്‍പ്പെടെയുള്ള മെഡിക്കല്‍ പ്രൊഫഷണലുകള്‍;
– യൂണിവേഴ്‌സിറ്റി, കോളേജ്, ഉയര്‍ന്ന വിദ്യാഭ്യാസ ഇന്‍സ്റ്റിറ്റ്യൂട്ട് എന്നിവയിലെ പ്രൊഫസര്‍മാര്‍;
– സ്‌കൂള്‍ അഡ്മിനിസ്‌ട്രേറ്റര്‍മാര്‍, വൈസ് പ്രിന്‍സിപ്പല്‍മാര്‍, വിദ്യാഭ്യാസ ഉപദേഷ്ടാക്കള്‍, അധ്യാപകര്‍, സാമൂഹിക പ്രവര്‍ത്തകര്‍, സര്‍ക്കാര്‍ മേഖലയിലെ ലബോറട്ടറി അറ്റന്‍ഡന്റുകള്‍;
– സര്‍വകലാശാലകളിലെ സാമ്പത്തിക ഉപദേഷ്ടാക്കള്‍;
– വിവിധ സ്ട്രീമുകളില്‍ ജോലി ചെയ്യുന്ന എഞ്ചിനീയര്‍മാര്‍;
– മസ്ജിദുകളില്‍ ഇമാമുമാര്‍, മതപ്രഭാഷകര്‍, പ്രാര്‍ഥനയ്ക്കായി ബാങ്ക് വിളിക്കുന്ന മുഅദ്ദിന്‍മാര്‍;
– സര്‍ക്കാര്‍ ഏജന്‍സികളിലും സ്വകാര്യ സര്‍വ്വകലാശാലകളിലും ജോലി ചെയ്യുന്ന ലൈബ്രേറിയന്മാര്‍;
– നഴ്സുമാര്‍, പാരാമെഡിക്കുകള്‍, മെഡിക്കല്‍ ടെക്നീഷ്യന്‍മാര്‍, സാമൂഹിക സേവന പ്രവര്‍ത്തകര്‍ എന്നിവരുള്‍പ്പെടെ ആരോഗ്യ മന്ത്രാലയത്തിനു കീഴിലെ ജീവനക്കാര്‍;
– സര്‍ക്കാര്‍ മേഖലയിലെ സാമൂഹിക പ്രവര്‍ത്തകരും മനഃശാസ്ത്രജ്ഞരും;
– പത്രപ്രവര്‍ത്തകര്‍, മാധ്യമ പ്രൊഫഷണലുകള്‍, പ്രത്യേക ലേഖകര്‍;
– ഫെഡറേഷനുകളിലെയും ക്ലബ്ബുകളിലെയും കായിക പരിശീലകരും അത്‌ലറ്റുകളും;
– പൈലറ്റുമാരും ഫ്‌ളൈറ്റ് അറ്റന്‍ഡന്റുമാരും;
– ശ്മശാനങ്ങളിലെ നടപടിക്രമങ്ങള്‍ക്ക് മേല്‍നോട്ടം വഹിക്കുന്ന പ്രൊഫഷണലുകള്‍.
ഒരു എന്‍ട്രി വിസയില്‍ കുവൈറ്റില്‍ എത്തിയതിന് ശേഷമാണ് ഫാമിലി റെസിഡന്‍സ് വിസയ്ക്കുള്ള അപേക്ഷകള്‍ സമര്‍പ്പിക്കേണ്ടത്. കുവൈറ്റില്‍ എത്തി രണ്ട് മാസത്തിനുള്ളില്‍ നടപടിക്രമങ്ങള്‍ പൂര്‍ത്തിയാക്കണം. ഈ വിസയില്‍ രാജ്യത്ത് കഴിയുന്നവര്‍ക്ക് പുറത്ത് ഏതെങ്കിലും മേഖലയില്‍ തൊഴിലില്‍ ഏര്‍പ്പെടാന്‍ അനുവാദമില്ല.
