ദുബായ്: ലോകത്തിലെ ഏറ്റവും വലിയ വിമാനതാവള ടെർമിനലിൻ്റെ നിർമാണം ദുബായ് ആരംഭിച്ചതായി എമിറേറ്റ് ഭരണാധികാരി പറഞ്ഞു. 35 ബില്യൺ ഡോളറിൻ്റെ എയർപോർട്ട് ടെർമിനൽ പദ്ധതിയാണ് ആരംഭിക്കുന്നതെന്ന് ദുബായ് പ്രധാനമന്ത്രിയും വൈസ് പ്രസിഡൻ്റുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം പറഞ്ഞു. പുതിയ ടെർമിനലിന് നിലവിലെ ദുബായ് അന്താരാഷ്ട്ര വിമാനത്താവളത്തേക്കാൾ അഞ്ചിരട്ടി വലിപ്പമുണ്ടാകുമെന്നും പ്രതിവർഷം 260 ദശലക്ഷം യാത്രക്കാരെ വഹിക്കാൻ ശേഷിയുണ്ടാകുമെന്നും ഷെയ്ഖ് മുഹമ്മദ് ബിൻ റാഷിദ് അൽ മക്തൂം പറഞ്ഞു.
ദുബായ് ഇൻ്റർനാഷണൽ എയർപോർട്ടിലെ എല്ലാ പ്രവർത്തനങ്ങളും വരും വർഷങ്ങളിൽ പുതിയ അൽ മക്തൂം ഇൻ്റർനാഷണൽ എയർപോർട്ടിലേക്ക് മാറ്റുമെന്നും ഷെയ്ഖ് മുഹമ്മദ് പറഞ്ഞു.
ദുബായ് സൗത്തിലെ വിമാനത്താവളത്തിന് ചുറ്റും പുതിയ നഗരം നിർമിക്കും. ഒരു ദശലക്ഷം ആളുകൾക്ക് പാർപ്പിട സൗകര്യവും ഉണ്ടാകും. ലോജിസ്റ്റിക്‌സ്, എയർ ട്രാൻസ്‌പോർട്ട് മേഖലകളിലെ ലോകത്തെ മുൻനിര കമ്പനികൾക്ക് ഇവിടെ എല്ലാവിധ സൗകര്യങ്ങളുമുണ്ടാകും. നമ്മുടെ കുട്ടികൾക്കും അവരുടെ കുട്ടികൾക്കും തുടർച്ചയായതും സുസ്ഥിരവുമായ വികസനം ഉറപ്പാക്കി ഞങ്ങൾ ഭാവി തലമുറകൾക്കായി ഒരു പുതിയ പ്രോജക്റ്റ് നിർമ്മിക്കുകയാണെന്നും ഷെയ്ഖ് മുഹമ്മദ് ബിൻ റാഷിദ് അൽ മക്തൂം പറഞ്ഞു.
അൽ മക്തൂം ഇൻ്റർനാഷണൽ എയർപോർട്ട്, യു.എ.ഇയിലെ മുൻനിര വിമാനകമ്പനിയായ എമിറേറ്റ്സിൻ്റെ പുതിയ കേന്ദ്രമായിരിക്കും. കൂടാതെ അഞ്ച് സമാന്തര റൺവേകളും 400 എയർക്രാഫ്റ്റ് ഗേറ്റുകളും ഉൾക്കൊള്ളുന്നതാണ് പുതിയ വിമാനതാവളം. പ്രമുഖ വ്യോമയാന കേന്ദ്രമെന്ന നിലയിൽ ദുബായിയുടെ സ്ഥാനം പുതിയ വിമാനതാവളം ഉറപ്പിക്കുമെന്ന് ദുബായ് എയർപോർട്ട് സിഇഒ പോൾ ഗ്രിഫിത്ത്സ് പറഞ്ഞു.
ദുബായിയുടെ വളർച്ച എല്ലായ്പ്പോഴും അതിൻ്റെ വ്യോമയാന അടിസ്ഥാന സൗകര്യങ്ങളുടെ വളർച്ചയ്‌ക്കൊപ്പം കൈകോർത്തിരിക്കുന്നു, ഇന്ന് ആ യാത്രയിൽ മറ്റൊരു ധീരമായ ചുവടുവെപ്പ് ഞങ്ങൾ കാണുന്നു,” ഗ്രിഫിത്ത്സ് പ്രസ്താവനയിൽ പറഞ്ഞു.
തുടർച്ചയായ 10 വർഷമായി അന്താരാഷ്ട്ര യാത്രകൾക്കായി ലോകത്തിലെ ഏറ്റവും തിരക്കേറിയ വിമാനത്താവളമാണ് ദുബായ് ഇൻ്റർനാഷണൽ എയർപോർട്ട്. കഴിഞ്ഞ വർഷം ഏകദേശം 87 ദശലക്ഷം യാത്രക്കാർ ട്രാൻസിറ്റ് ഹബായി ദുബായ് വിമാനതാവളത്തെ ഉപയോഗിച്ചുവെന്നാണ് കണക്ക്.
