ജിദ്ദ – ബസുകളുടെയും ട്രക്കുകളുടെയും ഭാഗത്തുള്ള നിയമ ലംഘനങ്ങള് ഓട്ടോമാറ്റിക് രീതിയില് നിരീക്ഷിച്ച് കണ്ടെത്തി പിഴ ചുമത്തുക ദിവസത്തില് ഒരു തവണ മാത്രമാണെന്ന് ട്രാന്സ്പോര്ട്ട് ജനറല് അതോറിറ്റി വക്താവ് സ്വാലിഹ് അല്സുവൈദ് അറിയിച്ചു. നഗരങ്ങള്ക്കകത്തും നഗരങ്ങള്ക്ക് പുറത്തുമെല്ലാം സഞ്ചരിക്കുന്ന ബസുകളുടെയും ട്രക്കുകളുടെയും ഭാഗത്തുള്ള നിയമ ലംഘനങ്ങള്ക്ക് ദിവസത്തില് ഒറ്റത്തവണ മാത്രമാണ് പിഴ ചുമത്തുക.
നിയമ ലംഘനങ്ങളുടെ പേരില് ദിവസത്തില് ഒന്നിലധികം തവണ പിഴ രേഖപ്പെടുത്തില്ല. നിയമ ലംഘനം തുടരുന്ന പക്ഷം തുടര്ന്നുള്ള ദിവസങ്ങളിലും പിഴകള് ചുമത്തും. ബസുകളുടെയും ട്രക്കുകളുടെയും നിയമപാലന തോത് ഉയര്ത്താനും, ഗതാഗത സുരക്ഷാ നിലവാരം ഉയര്ത്തുന്നതിന് സാങ്കേതിക വ്യവസ്ഥകള് ബാധകമാക്കാനും, സേവന നിലവാരം മെച്ചപ്പെടുത്താനുമാണ് നിയമ ലംഘനങ്ങള് ഓട്ടോമാറ്റിക് രീതിയില് നിരീക്ഷിച്ച് കണ്ടെത്തി പിഴ ചുമത്തുന്ന പദ്ധതിയിലൂടെ ലക്ഷ്യമിടുന്നത്.
ട്രാന്സ്പോര്ട്ട് ജനറല് അതോറിറ്റിയുടെ അധികാര പരിധിയില് വരുന്ന, വാഹനങ്ങുടെ ഭാഗത്തുള്ള നിയമ ലംഘനങ്ങള് ഓട്ടോമാറ്റിക് രീതിയില് നിരീക്ഷിച്ച് കണ്ടെത്തുന്ന പദ്ധതിയുടെ ഒന്നും രണ്ടും ഘട്ടങ്ങള് നടപ്പാക്കിയ ശേഷം 2023 ല് നിയമപാലന തോത് 91 ശതമാനമായി ഉയര്ന്നിരുന്നു. 2021 ല് ഇത് 79 ശതമാനമായിരുന്നെന്നും സ്വാലിഹ് അല്സുവൈദ് പറഞ്ഞു.
ബസുകളുടെയും ട്രക്കുകളുടെയും ഭാഗത്തുള്ള നിയമ ലംഘനങ്ങള് ഓട്ടോമാറ്റിക് രീതിയില് നിരീക്ഷിച്ച് കണ്ടെത്തി പിഴ ചുമത്തുന്ന സംവിധാനം ഈ മാസം 21 മുതലാണ് നടപ്പാക്കി തുടങ്ങിയത്. ചരക്ക് ഗതാഗത മേഖലയില് പ്രവര്ത്തിക്കുന്ന ട്രക്കുകള്, വാടകക്ക് നല്കുന്ന ലോറികള്, അന്താരാഷ്ട്ര സര്വീസുകള് നടത്തുന്ന ബസുകള്, വാടകക്ക് നല്കുന്ന ബസുകള് എന്നിവയുടെ ഭാഗത്തുള്ള നിയമ ലംഘനങ്ങളാണ് ഓട്ടോമാറ്റിക് രീതിയില് കണ്ടെത്തി രജിസ്റ്റര് ചെയ്ത് പിഴ ചുമത്തുന്നത്. ഓപ്പറേറ്റിംഗ് കാര്ഡ് നേടാതെ ബസുകളും ലോറികളും പ്രവര്ത്തിപ്പിക്കല്, കാലാവധി തീര്ന്ന ഓപ്പറേറ്റിംഗ് കാര്ഡ് ഉപയോഗിച്ച് പ്രവര്ത്തിപ്പിക്കല്, നിശ്ചിത പ്രവര്ത്തന കാലാവധി അവസാനിച്ച ബസുകള് സര്വീസിന് ഉപയോഗിക്കല് എന്നീ നിയമ ലംഘനങ്ങളാണ് ഓട്ടോമാറ്റിക് രീതിയില് കണ്ടെത്തി രജിസ്റ്റര് ചെയ്യുന്നത്.
ട്രാന്സ്പോര്ട്ട് ജനറല് അതോറിറ്റിയുടെ അധികാര പരിധിയില് വരുന്ന, വാഹനങ്ങളുടെ ഭാഗത്തുള്ള നിയമ ലംഘനങ്ങള് ഓട്ടോമാറ്റിക് രീതിയില് നിരീക്ഷിച്ച് കണ്ടെത്തി പിഴ ചുമത്തുന്ന സംവിധാനം മൂന്നു ഘട്ടമായി നടപ്പാക്കാന് അതോറിറ്റി നേരത്തെ തീരുമാനിച്ചിരുന്നു. ഇതുപ്രകാരം 2022 മാര്ച്ച് 13 ന് നിലവില്വന്ന ആദ്യ ഘട്ടത്തില് ടാക്സി കാറുകളുടെ ഭാഗത്തുള്ള നിയമ ലംഘനങ്ങളാണ് ഓട്ടോമാറ്റിക് രീതിയില് നിരീക്ഷിക്കാന് തുടങ്ങിയത്. 2023 ഫെബ്രുവരി ഒന്നു മുതല് സ്കൂള് ബസുകളും പദ്ധതി പരിധിയിലാക്കി. ഈ മാസം 21 മുതല് പ്രാബല്യത്തില്വന്ന മൂന്നാം ഘട്ടത്തില് ലോറികള്ക്കും ബസുകള്ക്കുമാണ് പദ്ധതി ബാധകമാക്കിയത്.
Leave a Reply