കുവൈറ്റ് സിറ്റി: ഇലക്ട്രോണിക് പേയ്മെന്റ് സംവിധാനം രാജ്യത്ത് വ്യാപകമാക്കുന്നതിന്റെ ഭാഗമായി ‘സാംസംഗ് പേ’, ‘ആപ്പിള്‍ പേ’ സേവനങ്ങള്‍ക്കു പിന്നാലെ ‘ഗൂഗിള്‍ പേ’ സൗകര്യവും കുവൈറ്റില്‍ വരുന്നു. ഇതിനായുള്ള നടപടികള്‍ ബാങ്കുകള്‍ പൂര്‍ത്തിയാക്കിയതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. ഇതുമായി ബന്ധപ്പെട്ട്, കുവൈറ്റ് ഫിനാന്‍സ് ഹൗസ് ഉള്‍പ്പെടെ മൂന്ന് ബാങ്കുകള്‍ക്ക് ആദ്യ ഘട്ടത്തില്‍ സെന്‍ട്രല്‍ ബാങ്ക് ഓഫ് കുവൈറ്റ് ഗൂഗ്ള്‍ പേ ആപ്ലിക്കേഷന്‍ സേവനങ്ങള്‍ ഉപഭോക്താക്കള്‍ക്ക് നല്‍കുന്നതിനുള്ള ലൈസന്‍സ് അനുവദിച്ചു കഴിഞ്ഞതായി അല്‍ റായ് പത്രം റിപ്പോര്‍ട്ട് ചെയ്തു.
ലൈസന്‍സ് ലഭിച്ചിരിക്കുന്ന ബാങ്കുകള്‍ ഇതുമായി ബന്ധപ്പെട്ട മാര്‍ഗ നിര്‍ദ്ദേശങ്ങളെല്ലാം പൂര്‍ത്തിയാക്കിക്കഴിഞ്ഞതായും പത്രം അറിയിച്ചു. തങ്ങളുടെ ഉപഭോക്താക്കളുടെ കാര്‍ഡുകളില്‍ ആവശ്യമായ മാറ്റങ്ങള്‍ വരുത്തി മാര്‍ച്ച് ആദ്യത്തോടെ രാജ്യത്ത് ഗൂഗ്ള്‍ പേ പേയ്മെന്റ് സേവനം ആരംഭിക്കാന്‍ ബാങ്കുകള്‍ക്ക് സാധിക്കുമെന്നാണ് പ്രതീക്ഷിക്കുന്നത്. ബാങ്കുകള്‍ അവരുടെ സംയുക്ത ഓട്ടോമേറ്റഡ് ബാങ്കിംഗ് സേവന കമ്പനിയായ കെനെറ്റുമായി സഹകരിച്ച് വ്യാപാര സ്ഥാപനങ്ങളില്‍ ഉള്‍പ്പെടെ പോയിന്റ്-ഓഫ്-സെയില്‍ ഉപകരണങ്ങളിലും ഗൂഗ്ള്‍ പേ വഴി പണം അടയ്ക്കാനുള്ള സംവിധാനവും ലഭ്യമാക്കും.
സാംസങ് പേ, ആപ്പിള്‍ പേ സേവനങ്ങളില്‍ നിന്ന് വ്യത്യസ്തമായി, ബാങ്കുകളില്‍ നിന്ന് യാതൊരു ഫീസും ഈടാക്കാതെയാണ് കുവൈറ്റില്‍ ”ഗൂഗിള്‍ പേ” സേവനം ലഭ്യമാക്കുകയെന്ന് സ്രോതസ്സുകള്‍ ചൂണ്ടിക്കാട്ടി. കുവൈറ്റില്‍ സേവനം ആരംഭിക്കുന്നതിനുള്ള അനുമതിക്ക് ധനമന്ത്രാലയത്തിന്റെ അനുമതി ആവശ്യമില്ലെന്നും സെന്‍ട്രല്‍ ബാങ്ക് ഓഫ് കുവൈറ്റില്‍ നിന്നുള്ള ലൈസന്‍സ് മാത്രം മതിയെന്നും അധികൃതര്‍ ചൂണ്ടിക്കാട്ടി. ക്രോം വിന്‍ഡോസ് സിസ്റ്റം ഉപയോഗിച്ച് പ്രവര്‍ത്തിക്കുന്ന ആന്‍ഡ്രോയിഡ് ഫോണുകളില്‍ ഗൂഗ്ള്‍ പേ സംവിധാനം ലഭ്യമാകും.
കുവൈറ്റില്‍ ഈ സേവനം ഔദ്യോഗികമായി ആരംഭിക്കുന്നതോടെ, രാജ്യത്തെ 90,000ത്തില്‍ പരം പിഒഎസ് മെഷീനുകള്‍ വഴി ഉള്‍പ്പെടെ ഗൂഗ്ള്‍ പേയുടെ സഹായത്തോടെ പണം അടയ്ക്കാന്‍ സാധിക്കും. ഗൂഗ്ള്‍ പേ ആപ്ലിക്കേഷന്‍ ഉപയോക്താക്കള്‍ക്ക് ഉയര്‍ന്ന തലത്തിലുള്ള പരിരക്ഷ നല്‍കുന്നതിനുള്ള ക്രമീകരണങ്ങള്‍ ബാങ്കുകള്‍ ഇതിനകം പൂര്‍ത്തിയാക്കിയതായും അധികൃതര്‍ അറിയിച്ചു. അതേസമയം ഹാക്കിംഗില്‍ നിന്നും തട്ടിപ്പുകളില്‍ നിന്നും തങ്ങളുടെ മൊബൈല്‍ ഫോണ്‍, കംപ്യൂട്ടര്‍ ഉള്‍പ്പെടെയുള്ള ഉപകരണങ്ങളെയും അക്കൗണ്ടുകളുടെയും സംരക്ഷണം ഉറപ്പാക്കുന്നതിനുള്ള എല്ലാ മുന്നൊരുക്കങ്ങളും ഉപഭോക്താക്കള്‍ പാലിക്കണമെന്നും അധികൃതര്‍ വ്യക്തമാക്കി.
കുവൈറ്റിൽ ഗൂഗ്ൾ പേ വരുന്നു
