ദുബായ് : യുഎഇ എമിറേറ്റ്സ് ഐഡി കാര്‍ഡിന്‍റെ കാലാവധി കഴിഞ്ഞിട്ടും അത് പുതുക്കിയില്ലെങ്കില്‍ 1000 ദിര്‍ഹം വരെ പിഴ ഈടാക്കുമെന്ന മുന്നറിയിപ്പുമായി ഫെഡറല്‍ അതോറിറ്റി ഫോര്‍ ഐഡന്‍റിറ്റി, സിറ്റിസണ്‍ഷിപ്പ്, കസ്റ്റംസ് ആന്‍ഡ് പോര്‍ട്ട് സെക്യൂരിറ്റി (ഐസിപി). യുഎഇ ഗവണ്‍മെന്‍റ് ഔദ്യോഗിക വെബ്സൈറ്റ് പ്രകാരം ഒരാളുടെ എമിറേറ്റ്സ് ഐഡി കാലഹരണപ്പെട്ടു കഴിഞ്ഞാല്‍, കാര്‍ഡ് ഉടമയ്ക്ക് അത് പിഴകളൊന്നും കൂടാതെ പുതുക്കാന്‍ 30 ദിവസം സമയമുണ്ട്. 30 ദിവസം കഴിഞ്ഞാല്‍ പ്രതിദിനം 20 ദിര്‍ഹം പിഴ നല്‍കേണ്ടി വരും. ഇത് പരമാവധി 1000 ദിര്‍ഹം വരെ നല്‍കേണ്ടിവരും.
എന്നാല്‍ ഇക്കാര്യത്തില്‍ ചില വിഭാഗങ്ങള്‍ക്ക് ഇളവുകള്‍ പ്രഖ്യാപിച്ചിട്ടുണ്ട്. യുഎഇ പൗരന്‍മാര്‍, ജിസിസി പൗരന്‍മാര്‍, പ്രവാസി താമസക്കാര്‍ എന്നിവര്‍ക്കെല്ലാം എമിറേറ്റ്സ് ഐഡി പുതുക്കുന്നത് വൈകിയാലുള്ള പിഴയില്‍ നിന്ന് ഇളവിന് അപേക്ഷിക്കാന്‍ അര്‍ഹതയുണ്ടായിരിക്കും. സ്വന്തം എമിറേറ്റ്സ് ഐഡി കാര്‍ഡോ, തന്‍റെ സ്‌പോണ്‍സര്‍ഷിപ്പിന് കീഴിലുള്ളവരുടെ ഐഡി കാര്‍ഡോ ഇഷ്യൂ ചെയ്യപ്പെടുകയോ നിശ്ചിത സമയപരിധിക്കുള്ളില്‍ പുതുക്കുകയോ ചെയ്തില്ലെങ്കില്‍, ഇനിപ്പറയുന്ന മാനദണ്ഡങ്ങള്‍ക്കു വിധേയമായി, പിഴയില്‍ നിന്ന് ഒഴിവാക്കുന്നതിന് അപേക്ഷിക്കാം:
– രാജ്യം വിട്ട് മൂന്ന് മാസത്തിലേറെയായി യുഎഇക്ക് പുറത്ത് താമസിക്കുന്ന വ്യക്തി. അല്ലെങ്കില്‍ വിദേശത്തായിരിക്കുമ്പോള്‍ താമസ കാലാവധി അവസാനിച്ച അല്ലെങ്കില്‍ യുഎഇയില്‍ നിന്ന് പോയതിന് ശേഷം ഐഡി കാര്‍ഡിന്‍റെ സാധുത കാലഹരണപ്പെട്ട താമസക്കാരന്‍. യാത്രാ രേഖയുടെ സഹായത്തോടെ ഇത് തെളിയിക്കണം.
– എക്‌സിക്യൂട്ടീവ് അല്ലെങ്കില്‍ ജുഡീഷ്യല്‍ ഉത്തരവിന്‍റെ ഫലമായി വിദേശത്തായിരിക്കുമ്പോള്‍ ഐഡി കാര്‍ഡിന്‍റെ സാധുത കാലഹരണപ്പെട്ട അല്ലെങ്കില്‍ ഒരു കേസില്‍ പാസ്പോര്ട്ട് തടഞ്ഞുവച്ചിരിക്കുന്ന വ്യക്തി. കേസുമായി ബന്ധപ്പെട്ട രേഖകളോ പാസ്പോര്ട്ട് തടഞ്ഞുവച്ചതായി കാണിക്കുന്ന രേഖയോ അപേക്ഷയ്‌ക്കൊപ്പം ഹാജരാക്കണം.
– കിടപ്പു രോഗി, പകര്‍ച്ചവ്യാധി ബാധിച്ച വ്യക്തി, അല്ലെങ്കില്‍ ഭാഗികമോ പൂര്‍ണ്ണമായ ഭിന്നശേഷിത്വം ഉള്ള വ്യക്തി ഇവര്‍ക്കും പിഴയിളവിന് അര്‍ഹതയുണ്ട്. രാജ്യത്തെ ബന്ധപ്പെട്ട അധികാരികള്‍ നല്‍കുന്ന മെഡിക്കല്‍ സര്‍ട്ടിഫിക്കറ്റ് ഉപയോഗിച്ച് ഇത് തെളിയിക്കേണ്ടതാണ്.
– രാജ്യത്തെ നയതന്ത്ര അല്ലെങ്കില്‍ കോണ്‍സുലാര്‍ ദൗത്യങ്ങളുടെ സ്റ്റാഫിനും അവരുടെ സംരക്ഷണത്തിലുള്ളവര്‍ക്കും പിഴയിളവ് ലഭിക്കും.
– ഉപഭോക്തൃ സേവന കേന്ദ്രങ്ങള്‍ സന്ദര്‍ശിക്കാന്‍ കഴിയാത്ത 70 വയസ്സിനു മുകളിലുള്ള പ്രായമായവര്‍. കുടുംബ പുസ്തകമോ പാസ്പോര്‍ട്ടോ മറ്റേതെങ്കിലും ആധികാരിക രേഖയോ ഉപയോഗിച്ച് അവര്‍ പ്രായം തെളിയിക്കണം.
– സാമൂഹിക സുരക്ഷാ പദ്ധതിയുടെ ഗുണഭോക്താക്കളായ ആളുകളും അവരുടെ സ്‌പോണ്‍സര്‍ഷിപ്പിന് കീഴിലുള്ളവരും. സാമൂഹികകാര്യ മന്ത്രാലയമോ മറ്റ് ബന്ധപ്പെട്ട അധികാരികളോ നല്‍കുന്ന ഔദ്യോഗിക സര്‍ട്ടിഫിക്കറ്റ് തെളിവായി ഹാജരാക്കണം.
– ഡോക്യുമെന്‍റേഷനിലെ പിഴവുകള്‍ മൂലമോ എമിറേറ്റ്സ് ഐഡിയുടെ സിസ്റ്റമോ അതിലെ ഒരു സ്റ്റാഫ് അംഗമോ അത് നിയോഗിച്ചിട്ടുള്ള ടൈപ്പിംഗ് ഓഫീസുകളോ കാരണം രജിസ്‌ട്രേഷനോ ഐഡി കാര്‍ഡ് ഇഷ്യൂ ചെയ്യുന്നതിനോ കാലതാമസം നേരിട്ടാലും ആ വ്യക്തിക്ക് പിഴയിളവിന് അര്‍ഹതയുണ്ടായിരിക്കും.
ഐസിഎയുടെ വെബ്സൈറ്റായ http://ica.gov.ae യില്‍ ലോഗിന്‍ ചെയ്തോ ‘ICA UAE’ സ്മാര്‍ട്ട്ഫോണ്‍ ആപ്ലിക്കേഷന്‍ വഴിയോ നിങ്ങള്‍ക്ക് പിഴ ഒഴിവാക്കലിന് ഫയല്‍ ചെയ്യാം. യുഎഇ പാസ് ഉപയോഗിച്ചോ വെബ്സൈറ്റിലോ ആപ്പിലോ അക്കൗണ്ട് സൃഷ്ടിച്ചോ സിസ്റ്റത്തിലേക്ക് ലോഗിന്‍ ചെയ്യാന്‍ കഴിയും. നിങ്ങള്‍ വെബ്സൈറ്റിലോ ആപ്പിലോ എത്തിക്കഴിഞ്ഞാല്‍, ‘പൊതു സേവനങ്ങള്‍’ വിഭാഗം സന്ദര്‍ശിക്കുക. ‘എമിറേറ്റ്സ് ഐഡി’ സേവനങ്ങള്‍ക്ക് കീഴില്‍, ‘കാലതാമസ ഫീസില്‍ നിന്ന് ഒഴിവാക്കാനുള്ള അപേക്ഷ’ തിരഞ്ഞെടുക്കുക. പിഴ ഇളവിന് നിങ്ങള്‍ യോഗ്യനാണെന്ന് തെളിയിക്കുന്നതിന് അനുബന്ധ രേഖകള്‍ ഇവിടെ സമര്‍പ്പിക്കണം.
ഓണ്‍ലൈനായി അപേക്ഷാ പ്രക്രിയ പൂര്‍ത്തിയാക്കാന്‍ കഴിയുന്നില്ലെങ്കില്‍, ഐസിഎയുടെ ഏതെങ്കിലും ഉപഭോക്തൃ സന്തോഷ കേന്ദ്രങ്ങള്‍ വഴിയും ഇളവിന് അപേക്ഷിക്കാവുന്നതാണ്. ഉപഭോക്തൃ സന്തോഷ കേന്ദ്രങ്ങളുടെ പൂര്‍ണ്ണമായ ലിസ്റ്റും സ്ഥലവും https://ica.gov.ae/en/customer-happiness-centers/ ല്‍ ലഭിക്കും. അപേക്ഷ സമര്‍പ്പിച്ചുകഴിഞ്ഞാല്‍, അത് അംഗീകരിച്ചോ നിരസിച്ചോ എന്നതിനെ കുറിച്ച് 48 മണിക്കൂറിനുള്ളില്‍ നിങ്ങള്‍ക്ക് ഐസിഎയില്‍ നിന്ന് സന്ദേശം ലഭിക്കും.
വിസാ വിവരങ്ങളുമായി എമിറേറ്റ്സ് ഐഡി ബന്ധിപ്പിച്ചതിനാല്‍ വിസ തീരുന്നതിനൊപ്പം ഐഡി കാര്‍ഡും പുതുക്കുകയാണ് വേണ്ടത്. ഐസിപിയുടെ വെബ്സൈറ്റിലോ സ്മാര്‍ട്ട് ആപ്പിലോ റജിസ്റ്റര്‍ ചെയ്ത് വ്യക്തികള്‍ക്ക് നേരിട്ടു പുതുക്കാവുന്നതാണ്. വ്യക്തിഗത വിവരങ്ങള്‍ തെറ്റുകൂടാതെ ടൈപ്പ് ചെയ്ത് കളര്‍ ഫോട്ടോ, പാസ്പോര്ട്ട് കോപ്പി എന്നിവ അറ്റാച്ച് ചെയ്ത് ഫീസടച്ചാല്‍ കാര്‍ഡ് കൊറിയറില്‍ വീട്ടിലെത്തിക്കും. സ്വന്തമായി ചെയ്യാന്‍ അറിയാത്തവര്‍ക്ക് ഉപഭോക്തൃ കേന്ദ്രങ്ങളിലോ ടൈപ്പിംഗ് സെന്‍ററുകളിലോ നേരിട്ട് ചെന്ന് പുതുക്കാം. മൊത്തം 250 ദിര്‍ഹമാണ് ഐഡി കാര്‍ഡ് പുതുക്കുന്നതിനുള്ള ഫീസ്. (100 ദിര്‍ഹം എമിറേറ്റ്സ് ഐഡിക്കും 100 ദിര്‍ഹം സ്മാര്‍ട്ട് സര്‍വീസ് ഫീസും 50 ഇലക്ട്രോണിക് സര്‍വീസ് ഫീസ്). അടിയന്തരമായി കാര്‍ഡ് ആവശ്യമുള്ളവര്‍ 50 ദിര്‍ഹം അധികം നല്‍കണം.
എമിറേറ്റ്സ് ഐഡി കാര്‍ഡിന്‍റെ കാലാവധി കഴിഞ്ഞിട്ടും അത് പുതുക്കിയില്ലെങ്കില്‍ 1000 ദിര്‍ഹം വരെ പിഴ
