യുഎഇ ദേശീയ ദിനത്തോടനുബന്ധിച്ച് വാഹനം അലങ്കരിക്കുന്നതിന് അബൂദാബി പോലീസ് മാര്‍ഗനിര്‍ദേശം പുറപ്പെടുവിച്ചു.
നിയമവിരുദ്ധമായി വാഹനങ്ങള്‍ അലങ്കരിക്കുന്നവര്‍ക്കെതിരെ നടപടി സ്വീകരിക്കുമെന്നും അധികൃതര്‍ അറിയിച്ചു. ഡിസംബര്‍ ആറുവരെ ദേശീയ ദിനാഘോഷങ്ങളുടെ ഭാഗമായി പൊതുജനങ്ങള്‍ക്ക് വാഹനങ്ങള്‍ അലങ്കരിക്കാനുളള അനുമതിയുണ്ട്. എന്നാല്‍, വാഹനത്തിന്റെ സ്വാഭാവികത നഷ്ടപ്പെടുത്തുന്ന തരത്തില്‍ എഞ്ചിനിലോ ഘടനയിലോ മാറ്റം വരുത്തരുത്. ഒപ്പം ഡ്രൈവറുടെ കാഴ്ച മറയും വിധമോ നമ്പര്‍ പ്ലേറ്റ് മറയത്തക്ക വിധമോ വാഹനം അലങ്കരിക്കരുതെന്നും പോലീസ് വ്യക്തമാക്കി. വാഹനങ്ങള്‍ ട്രാഫിക് നിയമങ്ങള്‍ ലംഘിക്കുന്ന തരത്തില്‍ ഉപയോഗിക്കരുത്. കൂടാതെ ടാക്സി, ബസ്, സ്വകാര്യ വാഹനങ്ങള്‍ എന്നിവയുടെ സഞ്ചാരം തടസപ്പെടുത്തരുതെന്നും നിര്‍ദേശം വ്യക്തമാക്കുന്നുണ്ട്.
ദേശീയ ദിനാഘോഷത്തിന്റെ ഭാഗമായി വാഹനങ്ങള്‍ മോടി പിടിപ്പിക്കുന്നവര്‍ക്ക് ദുബായ് പോലീസും നിര്‍ദ്ദേശങ്ങള്‍ പുറത്തിറക്കിയിട്ടുണ്ട്. ഇതുമായി ബന്ധപ്പെട്ട് എട്ട് നിര്‍ദ്ദേശങ്ങളാണ് ദുബായ് പോലീസ് മുന്നോട്ടുവച്ചിരിക്കുന്നത്. താമസക്കാര്‍ക്ക് അവരുടെ കാറുകള്‍ അലങ്കരിക്കാം. പക്ഷേ, അത് തങ്ങള്‍ക്കോ മറ്റ് റോഡ് ഉപയോക്താക്കള്‍ക്കോ ഭീഷണിയാവുന്ന തരിത്തില്‍ അല്ലെന്ന് ഓരോരുത്തരും ഉറപ്പാക്കണം. വാഹനത്തിന്റെ നിറങ്ങളില്‍ മാറ്റം വരുത്തരുത്, വാഹനങ്ങള്‍ ഓവര്‍ലോഡ് ചെയ്യരുത്, മോശമായ വാക്കുകളോ അനുചിതമായ സ്റ്റിക്കറുകറുകളോ വാഹനങ്ങളില്‍ പതിക്കരുത്. മുന്നിലും പിന്നിലുമുള്ള ലൈസന്‍സ് പ്ലേറ്റുകള്‍ മറയ്ക്കുന്ന വിധത്തില്‍ അലങ്കാരങ്ങള്‍ പാടില്ല.
വാഹനമോടിക്കുന്നവരോ യാത്ര ചെയ്യുന്നവരോ മറ്റുള്ളവര്‍ക്കു മേല്‍ ഒരു തരത്തിലുമുള്ള സ്‌പ്രേയും ഉപയോഗിക്കരുതെന്നും പോലീസ് അറിയിച്ചു. അതേപോലെ, അശ്രദ്ധമായ ഡ്രൈവിംഗും വാഹനം ഉപയോഗിച്ചുള്ള അഭ്യാസ പ്രകടനങ്ങളും പൂര്‍ണ്ണമായും നിരോധിച്ചിട്ടുണ്ട്. വാഹന റാലികള്‍ പാടില്ല.
വാഹനമോടിക്കുന്നവര്‍ ഗതാഗതം തടസ്സപ്പെടുത്തുകയോ മറ്റുള്ളവരുടെ വഴി തടയുകയോ ചെയ്യരുത്. വാഹനത്തിന്റെ സൈഡ് വിന്‍ഡോ, മുന്‍ഭാഗം എന്നിവ സ്റ്റിക്കറുകളോ മറ്റോ ഉപയോഗിച്ച് മറയ്ക്കുന്നത് നിയമവിരുദ്ധമാണ്. യാത്രക്കാര്‍ വാഹനത്തിന് മുകളിലോ വശങ്ങളിലോ നിന്ന് യാത്ര ചെയ്യരുത്. അശ്രദ്ധമായി വാഹനമോടിച്ചാല്‍ 2000 ദിര്‍ഹം പിഴയും 23 ബ്ലാക്ക് പോയിന്റും ലഭിക്കുമെന്ന് ദുബായ് പോലീസ് അറിയിച്ചു. 60 ദിവസത്തേക്ക് വാഹനങ്ങള്‍ പിടിച്ചെടുക്കുകയും ചെയ്യും. ശബ്ദമുള്ള വാഹനം ഓടിച്ചാല്‍ 2,000 ദിര്‍ഹവും 12 ബ്ലാക്ക് പോയിന്റുകളും ലഭിക്കും. കൂടാതെ, അനുവദനീയമായ പരിധിക്കപ്പുറം വാഹനങ്ങളില്‍ ആളുകളെ കയറ്റുന്നത് 1,500 ദിര്‍ഹം പിഴ ലഭിക്കാവുന്ന കുറ്റമാണ്. റോഡിന്റെ നടുവില്‍ ഒരു കാരണവശാലും വാഹനം നിര്‍ത്താന്‍ അനുവദിക്കുന്നില്ല. ഈ കുറ്റത്തിന് 1,000 ദിര്‍ഹം പിഴയും ആറ് ബ്ലാക്ക് പോയിന്റുമാണ് ശിക്ഷ.
ദേശീയ ദിനാഘോഷത്തിന്റെ ഭാഗമായി ഷാര്‍ജ എമിറേറ്റും ട്രാഫിക് പിഴകളില്‍ 50 ശതമാനം ഇളവ് പ്രഖ്യാപിച്ചു. 2022 ഡിസംബര്‍ 1 നും 2023 ജനുവരി 20 നും ഇടയില്‍ വാഹനമോടിക്കുന്നവര്‍ക്ക് ഇളവ് ലഭിക്കും. 2022 ഡിസംബര്‍ 1-ന് മുമ്പ് ലഭിച്ച പിഴകള്‍ക്കും ഇളവ് ബാധകമാണ്. യുഎഇയുടെ 51-ാമത് ദേശീയ ദിനാഘോഷത്തോടനുബന്ധിച്ച് ഷാര്‍ജ എക്സിക്യൂട്ടീവ് കൗണ്‍സിലിന്റെ തീരുമാനത്തെ തുടര്‍ന്നാണ് പ്രഖ്യാപനം. ഇളവുകള്‍ ഡിസംബര്‍ 1 മുതല്‍ പ്രാബല്യത്തില്‍ വരും. ജനുവരി 20 വരെ തുടരും. തീരുമാനം ശരിയായ രീതിയില്‍ നടപ്പാക്കാന്‍ പോലീസ് എല്ലാ നടപടികളും സ്വീകരിച്ചു തുടങ്ങിയതായി ഷാര്‍ജ പോലീസ് കമാന്‍ഡര്‍ ഇന്‍ ചീഫ് മേജര്‍ ജനറല്‍ സെയ്ഫ് അല്‍ സാരി അല്‍ ഷംസി പറഞ്ഞു.
ഗുരുതരമായ ലംഘനങ്ങള്‍ ഒഴികെ 2022 ഡിസംബര്‍ 1-ന് മുമ്പ് നടത്തിയ എല്ലാ ലംഘനങ്ങളും ഇളവിന്റെ പരിധിയില്‍ വരുമെന്നും അദ്ദേഹം അറിയിച്ചു. ആഘോഷ വേളയില്‍ താമസക്കാരുടെ സാമ്പത്തിക ബാധ്യതകള്‍ ലഘൂകരിക്കുകയെന്ന ലക്ഷ്യത്തോടെയാണ് തീരുമാനം. അതേസമയം, വാഹനമോടിക്കുന്നവര്‍ നിയമങ്ങളും ചട്ടങ്ങളും പാലിക്കണമെന്നും അദ്ദേഹം ആവശ്യപ്പെട്ടു.
